भांगरभूंय | प्रतिनिधी
पणजीः 2022-23 वर्सा राज्यांतल्या वेगवेगळ्या शाळांच्या वाचनालयांत आनी पुस्तक बँकांनी 39 लाख 46 हजार 645 पुस्तकां आशिल्लीं. 2024-25 वर्सा हो आंकडो वाडून 44 लाख 25 हजार 194 जालो. फाटल्या दोन वर्सांत राज्यांतल्या शाळांनी 2.38 लाख पुस्तकां विकतीं घेतल्यांत. हाचो अर्थ दर वर्सा सरासरी 1.19 लाख पुस्तकां शाळेच्या वाचनालयांत जोडल्यात. ही म्हायती केंद्रीय शिक्षण मंत्रालयाच्या युडीआयएसइ प्लस अहवालांतल्यान मेळयल्या.
अहवाला प्रमाण, 2024-25 वर्सा राज्यांत वट्ट 1479 शाळा आसात. सगळ्या शाळांनी वाचनालय वा पुस्तक बँकेची सुविधा आसा. वट्ट पुस्तकांचो आंकडो मतींत घेतल्यार दरेक शाळेंत सरासरी 2992 पुस्तकां उपलब्ध आसात. सरासरी पुस्तकां चड आशिल्ल्या राज्यांच्या क्रमवारींत गोंयचो क्रमांक देशांत पयलो आसा. हे वळेरेंत केरळ दुसरे सुवातेर आसा. थंयच्या शाळांनी सरासरी २८३६ पुस्तकां आसात. ताचे उपरांत हरियाण (2242) आनी कर्नाटक (1636 पुस्तकां) आसात.
अहवाला प्रमाण, देशभरांतल्या शाळांनी 121 कोटी परस चड पुस्तकां आसात. देशभरांतल्या शाळांनी सरासरी 827 पुस्तकां उपलब्ध आसात. केंद्रीय प्रदेशांतल्या शाळांनी चंडीगढ मुखार आसा. हांगा दर शाळेत सरासरी 9990 पुस्तकां आसात. ताचे उपरांत दिल्ली (5932), पुडुचेरी (3348) हांचो क्रमांक आसा. देशांतली सगळ्यांत उणी सरासरी मेघालयांत आसा. हांगा दर शाळेत फकत 120 पुस्तकां आसात.
फकत 2.77 टक्के शाळांनी डिजिटल वाचनालय
अहवाला प्रमाण, राज्यांतल्या 1479 शाळांतल्या फकत 41 शाळांनी (2.77 टक्के) डिजिटल वाचनालय आसा. हातूंत 10 सरकारी शाळा, 23 अनुदानित शाळा आनी 8 खाजगी विना अनुदानित शाळा हांचो आस्पाव आसा. केरळांत 19.5 टक्के शाळांनी डिजिटल वाचनालय आसा. मिझोरामांत हो आंकडो 0.1 टक्के उणो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
