भांगरभूंय | प्रतिनिधी
1 एप्रील 2020 ते 30 जून 2025 मेरेन 24.07 कोटी वाशील
भांगरभूंय । प्रतिनिधी
पणजी : फाटल्या कांय वर्सांत येरादारी खात्या कडल्यान विवीध येरादारी नेम मोडिल्ले खातीर दितात त्या तालांवांत तशेंच वाशील केल्ल्या तालांवाचे रकमेंत वाड जाल्या. 1 एप्रील 2020 ते 30 जून 2025 ह्या काळांत येरादारी ख्त्यान वट्ट 24.07 कोटी रुपयांचो तालांव वाशील केला. हाचोच अर्थ म्हयन्याक 38.20 लाख जाल्यार दिसाक सरासरी 1.25 लाखांचो तालांव वाशील केला. येरादारी मंत्री मॉवीन गुदिन्हो हांणी विधानसभेंत दिल्ले लेखी जापेंतल्यान ही म्हायती मेळ्ळ्या. हे संबंदांत आमदार क्रूझ सिल्वा हांणी अतारांकीत प्रस्न उपस्थीत केल्लो.
येरादारी खात्यान येरादारी नेम मोडिल्ले खातीर दिल्ल्या तालांवाची रकम ही प्रत्यक्षांत जमा जाल्ल्या तालांवाचे रकमे परस चड आसा. 2020-21 त 30.31 लाख रुपयांच्या तालांवांतले 28.97 लाख वाशील केल्यात. 2021-22 त 1.24 कोटी रुपयांच्या तालांवांतले 1.09 कोटी रुपया वाशील केल्यात. 2022-23 त 4.22 कोटी रुपयांच्या तालावांतले 3.49 कोटी रुपया वाशील जाल्यात. 2023-24 त 13.40 कोटी रुपयांच्या तालावांतले 8.52 कोटी रुपया वाशील जाल्यात. 2024-25 त आतां मेरेन 21.62 कोटी रुपयांच्या तालावांतले 9.42 कोटी रुपया वाशील जाल्यात.
जापेंत दिल्ले म्हायती प्रमाण, येरादारी खात्यान 1 एप्रील 2020 ते 30 जून 2025 ह्या काळांत गोंयचे शिमे वयल्या तपासणी नाक्याचेर येरादारी नेम मोडिल्ल्या प्रकरणांत 2.75 कोटी रुपयांचो तालांव वाशील केला.
हे मजगतीं, मोलें नाक्या वयल्यान सगल्यांत चड तालांव वाशील जाला. ते भायर स्मार्ट कॅमेऱ्यां वरवीं 1 एप्रील 2023 ते 30 जून 2025 ह्या काळांत 2 लाख 11 हजार 323 रुपयांचे तालांव दिल्यात. हे वरवीं 22.46 कोटी रुपयांचे तालांव दिल्यात. तातूंतले 8.98 कोटी रुपयांचो तालांव वाशील केला.
पुलिसां कडल्यान 76.86 कोटींचो तालांव वाशील
जानेवारी 2020 ते जून 2025 ह्या काळांत गोंय पुलिशेच्या येरादारी विभागान येरादारी नेम मोडिल्ले खातीर 22 लाख 43 हजार 534 प्रकरणांची नोंद केल्या. तातूंतल्यान खात्यान 76 कोटी 86 लाख 81 हजार 851 रुपयांचो तालांव वाशील केला. फोंडें येरादारी विभागान सगल्यांत चड 2.51 लाख येरादारी नेम मोडिल्ल्या कडल्यान 8.96 कोटी रुपयांचो तालांव वाशील केला, अशी म्हायती मंत्री मॉवीन गुदिन्हो हांणी दिल्ले जापेंतल्यान मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
