भांगरभूंय | प्रतिनिधी
धर्तरेचेर 70 टक्क्यां परस चड उदक आसा. सगलेंच पिवंक वा पिकावळ घेवंक उपेगाचें ना. मात, उदका स्रोताचो व्हडलो फायदो मनीसजातीक जाता, हें न्हयकारूंक मेळचें ना. खास करून दर्यांतलें उदक आमी इबाडपाक दिवंक जायना. काल नॅशनल इन्स्टिट्यूट आॅफ ओशियनोग्राफीचो साठावो वर्धापन दीस जालो. तातूंत शाश्वत उदरगत सादपाक दर्याचेर चड संशोधन करपाची गरज आसा, अशें मानेस्तांनी सांगलें. आतां मेरेन मनशान फक्त पांच टक्के खोल दर्याचो थाव घेतला. म्हणटकच अजून 95 टक्के काम उरलां. करप्याक खूब कितें करूं येता. जाय ती फक्त इत्साशक्त, मेहनत आनी अर्थांत पयसो. आंतरराष्ट्रीय समुदायान मनार घेतल्यार हें शक्य आसा. फक्त अतिक्रमणां करून दर्या बळकावपाचो यत्न चीना सारक्या देशांनी
करचो न्हय.
दर्याक बरे दीस दाखोवपाचें काम पयलीं हातांत घेवंक जाय…. आनी हें समाज, सरकारां करूंक शकता. नॅशनल जिओग्राफीकच्या मतान, सध्या दर्यांत 5.25 ट्रिलीयन प्लास्टीक कुडके आसात. धर्तरेची लोकसंख्या आठ अब्ज. आमच्या देशाचे तीन वांटे केले जाल्यार सादारण एक वांटो ह्या प्लास्टिकान पुराय भरतलो. प्लास्टीक दर्यांतले उणेच एक लाख जीव दरवर्सा मारून उडयता. तुटिल्लीं जाळीं, पोतयो हाका लागून नुस्तें आनी हेर जिवांचेर हावळ आयिल्ली सगल्यांनी सोशल मिडिया वयल्या व्हिडियोंचेर पळयल्याच आसतली.
एकूच फावट वापरपाचें (सिंगल यूज) प्लास्टीक दर्या प्रदुशणाचो सगल्यांत व्हडलो घटक. हातूंत कपां, स्ट्राॅचो आस्पाव आसा. दर्यांत कोयर जाता, ताका दर्यांतले वेवसाय फक्त 20 टक्के जापसालदार, उरिल्लो 80 टक्के कोयर जमनी वयल्यान थंय वता. तो तयार करपी अर्थांत आमीच. 30 वर्सां पयलीं दर्यांत वा जमनीचेर जितलो कोयर जातालो, ताचे दुपेटीन आयज जाता. प्रदुशणाक लागून दर्यांत कांय अशे वाठार तयार जाल्यात, जंय नुस्तें, वनस्पती तगपाक शकनात. थंय आॅक्सिजनाची पातळीय खूब उणी. तांकां डेड झोन म्हणटात. तांचो आंकडो वाडत आसा, ही खरी हुस्क्याची गजाल. जिवाश्म इंधन दर्यांतल्यान, जमनी वयल्यान मेळटा. खास करून कोळसो, सैमीक वायू, पेत्राेल आनी हेर. हें इंधन लासतकच ताचो धुंवर वा कण हवेंत गेल्ल्यान प्रदुशण जाता. दर्याय हातूंतल्यान सुटना. दर्याचे वयले पातळेचेर हाका लागून अॅसिडां तयार जातात. तीं दर्या जिवाक सामकीं मारक. जाणकारांच्या मतान, कांय देश बोटीं वरवीं आपलो कोयर दर्यांत व्हरून सोडटा. आपल्या न्हय, तर दुसऱ्या देशांच्या दर्यांत. घरचो कोयर, गटाराची घाण दुसऱ्याच्या दारांत, तशेंच हें. आंतरराष्ट्रीय समुदायान हाचेर उपाय काडपाक जाय.
दर्या पसून मनीस जातीक, पर्यावरणाक कितलो फायदो जाता, हाची चड म्हायती लोकांक ना. दर्या रानां परस चड आॅक्सिजन तयार करतात. थोड्यांच्या मतान पन्नास टक्के! दर्यांतलो फिटोप्लाक्टन हो जीव हें काम करता. दर्या सुर्या पसून येवपी किरणां ओडून घेता. उश्णतेचें वांटप करता. हून आनी थंड उदक हे वटेन ते वटेन गेल्ल्यान हें शक्य जाता. आमकां तरातरांचें नुस्तें मेळटा. मनशाक सगल्यांत चड प्रोटिन्स दर्या दिता. दर्यांतले नुस्तेमारीचेर संवसारांतले सादारण स कोटी लोक जगतात. दर्या संबंदीच्या कामांचेर तीन अब्ज लोक आपलें पोट भरतात. वखदां खातीर दर्या भितरलें पर्यावरण (विविध नुस्तें, जीव, वनस्पती) उपेगी. दर्यांतल्यो बोटी ह्यो लाखांनी लोकांचें येरादारीचें साधन. दर्याक लागून लोकांक मानसीक समाधान मेळटा. नाजाल्यार दर्यावेळांचेर गर्दी जावची नासली. दर्या पसून सैमीक गॅस आनी हेर इंधनां मेळटात. न्हंयो, बांयों, व्हाळां पसूनय फायदे मेळटात ते वेगळे.
गोंयचे एनआयओ सयत संवसारभरांतल्यो संस्था दर्याचेर संशोधन करीत आसात. दर्या पसून मनशांक, पर्यावरणाक उणें लुकसाण जावचें हे खातीर उपाय घेवपाक जाय. कारण त्सुनामी, मोडांनी मनशांक धपको दिला. दर्यांतल्या नव्या इंधनांचो सोद घेवंक जाय. ल्हारां पसून उर्जा तयार करपाक जाय. दर्याचें उदक पिवपा सारकें करप भोव गरजेचें. सुरवातेक खर्च खूब येता. पूण, उपरांत 10 पयशे लिटर गोड उदक मेळटा. सरकारान, व्हडल्या उद्देग समुहांनी हें उदक शुद्ध करपाचें मनार घेतल्यार बरें. फावो तितलीच नुस्तेमारी करप, उदक प्रदुशीत करप ना अशे कांय उपाय आमी घेवंक शकतात. दर्याक आमी देव मानतात. तो आपली संपत्त फुकटांत आमकां दिता. तातूंतल्यान आमी अब्जांनी रुपया जोडटात. त्या दुडवांचे आशेन आमी ताका ओरबडपाक लागल्यात. हें खाल्ल्या पानार हळशीक करपाक सारकें जालें ना?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
