भांगरभूंय | प्रतिनिधी
गोंय हें पर्यटन थळ हें शेमड्या पोरांक पसून खबर आसा. हें मळूच सध्या गोंयची तिजोरी भरता. देखून आमी थंय कसलेच गैरप्रकार जावपाक दिवंक जायना. सध्या दर्यादेग वा दर्यावेळ म्हणली काय विशिश्ट चित्र नदरे मुखार उबें रावता. भिरांकूळ अशें…. आनी तें खरें न्हय, अशें म्हणपाचें धाडस कोणूच करचोना. कारण ही गजाल पुराव्यान सिद्ध जाल्या. मागीर कोणूय हांगा तशें कांय जायना म्हणू. आपूण कोणाकूच दिसचें ना, हे भावनेन माजर दोळे धांपून दूद पियेता खंय. तसलीच ही गजाल. गैरप्रकार, गैरकारभार करपी लोकांचो पर्यटन मळाक धपको बसला…. आनी आतां शेजराच्या राज्यांनी सुरू जाल्ल्या विवीध सर्तींक लागून गोंयच्या पर्यटनाचेर हावळ येवं येता. देखून आमी पयलींच सादूर रावप गरजेचें. उदकांतल्या खेळांचो पर्यटन मंत्र्यांनी विधानसभा अधिवेशनांत उल्लेख केलो. मालवणां वाॅटरस्पोर्टस सुरू जाल्यात. गोंयांतूय ते आसात. (सगलेच कायदेशीर चलतात, काय बेकायदेशीर ताची सरकारी यंत्रणांनी पळोवणी करपाक जाय.) आमच्या गोंयांत कांय दलाल ह्या खेळांच्या चालकांक (आॅपरेटर) गिरायक हाडटात. मात 300 रुपया तिकेट आसल्यार कांय वेळार पर्यटकां कडल्यान दुपेटीन पयशे वसूल करतात. ह्या सगल्या वेव्हारां उपरांत हे दलाल आपली रक्कम वसूल करून उरिल्ली (थोडी) चालकांक दितात. हे दलाल नेमके कोण? पुलीस तांचेर कारवाय करपाक शकनात? तातूंत दर्यावेळांचेर विवीध वेवसाय करप्यां कडल्यानूय हप्ते घेवपाचे प्रकारूय जातात. पर्यटनमंत्री आनी हेर सरकारी यंत्रणांनी व्हडली सान्न घेवन दर्यावेळो नितळ करपाचो वेळ आयला. नाजाल्यार हो कोयर केन्ना दर्यावेळो इबाडटलो, तें कळचें पसून ना.
शेजराच्या कोंकणांत गोंय सारकेंच वातावरण आसा. कारवार जिल्होय हाका आडवाद ना. थंय पर्यटनाचे नदरेन उदरगत जाली जाल्यार आमच्या गोंयां खातीर तें मारक थारतलें. गोंयांत सगल्यांत म्हारग, तातूंत दर्यादेगांचेर दिसाउजवाडीं फिरपाक भिरांत, ही भावना देशी पर्यटकां मदीं वाडपाक लागल्या. महाराष्ट्र, कर्नाटक सरकार आपल्या पर्यटन थळांची जायरात नेटान करपाक लागलां. म्हणून आमी सादूर रावप जाय. उदका खेळ गोंयचे तुळेन मालवणांत सवाय आसात. पर्यटकूय थंय वचपाक लागल्यात. ही धोक्याची घांट थारूं येता. सरकारान सर्वंकश दर्यावळ वेवस्थापन धोरण आंखलां. तातूंत शॅक्सां विशींचें धोरणूय थारतलें. भोवतेक शॅक्स गोंयकारांकूच मेळटले, अशें मुख्यमंत्र्यान जाहीर केलां. ह्या शॅक्सांनी पर्यटकांक बऱ्यांतली बरी, परवडपा सारकी सेवा (जेवणा- खाणाची) मेळटली, हाचेर सगल्यांनीच भर दिवपाक जाय. हें युग म्हायती तंत्रज्ञानाचें हाचें भान आमी दवरचें. हणजुणचो प्रकार सोशल मिडियाक लागून संवसारभर पावलो. ताचो परिणाम थोडो तरी पर्यटन वेवसायाचेर जालो/ जातलो, हें विसरुन उपकारचें ना.
सरकारान आनीक एक म्हत्वाचो निर्णय घेतला, तो म्हणल्यार सौर उर्जेचो. पणजेंतल्या सगल्या सरकारी कार्यालयांचेर सौर उर्जा पॅनल उबारपाचें थारलां. फुडल्या मार्चा मेरेन तें काम पुराय जातलें. 150 मेगाव्हॅट सौर उर्जा ते वरवीं मेळटली. सौर उर्जेचो पर्यटन मळाकूय फायदो जातलो. कारण ताका सगल्यांत चड वीज लागता. सध्याची वीज पुरवण भरंवशाची नाशिल्ल्यान तांकां जनरेटराचेर अवलंबून रावचें पडटा. सौर उर्जेचो वापर कांय हाॅटेलां करतात. पूण सगल्यांनी तो केल्यार राज्याक फायदेशीर थारतलें. ही उर्जा म्हणल्यार सैमाची देणगी. तिचो आमी चडांत चड वापर करपाची गरज आसा. गोंयांत सध्या जाय ताचे परस उणी वीज मेळटा. ती हाडटलो जाल्यार आमचे कडेन विजेचें जाळें विणिल्लें ना. आसा तें चड वजें घेवपाक शकना. जर तसो यत्न जालो जाल्यार आमकां काळखांत रावचें पडूं येता. तेन्ना खांची, कोनशांनी विजेचें जाळें आनी अतिरिक्त वीज, ही काळाची गरज. सरकारान ताचेरुय विचार करूंक फावो. सौर उर्जेचे पॅनल फक्त पणजेच्याच न्हय, तर पुराय राज्यांतल्या सरकारी इमारतींचेर दिसचे. सरकारी शाळा, पुलीस स्टेशनां, उजो पालोवपी दळांच्या कार्यालयांचेरुय ती जाय. गोंयांत सौर उर्जा पॅनलांची पुरवण करपी जायते गोंयकार वितरक आसात. तेन्ना हें सौर उर्जेचें जाळें पुराय राज्यांत पातळवप तशें कठीण न्हय. हेर तरांच्या अक्षय उर्जां खातीरुय यत्न जावचे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
