दर्यावेळां वयलें पर्यटन सांबाळुया

भांगरभूंय | प्रतिनिधी

करोडांनी भारतीयांक आधुनिकताय, विदेशी संस्कृताय, चंगळवाद हाचें आकर्शण आसा. आपले कृतींतल्यान ते तशें प्रत्यक्ष दाखोवन दितात. सध्याचे ताण- तणावाचे जिणेंत चार खीण मजा, मस्ती करप तशें वायट न्हय, पूण ताचें गुन्यांवांत रुपांतर जावचें ना, हाची जतनाय घेवन. आधुनिकतायेचे खीण जगपाक भारतीय गोंयांत येतात, हें कोणूच न्हयकारचो ना. हांगाचें वातावरण इतिहासीक कारणांक लागून अस्तंती देशां कडेन लागीं वचपी आसा. गोंयांत येतकच फाॅरेनाक आयिल्ले सारकें दिसता, अशे जायते पर्यटक सांगतात. अर्थांत हें खरें काय फट तें दरेकल्यान थारावपाचें. कारण प्रत्येकाची आवड, रुच वेगळी. ते प्रमाण तांची मानसिकताय. गोंय पर्यटन राज्य म्हूण तेंगशेर पावलां, ताका दर्यावेळो, सोरो, नुस्तें, संगीत, इंग्लीश, मेकळ्या मनाचे गोंयकार, सैम, भारतीय आनी विदेशी संस्कृतीचो मिलाफ, कॅसिनोचें चड योगदान आसा. बरेच पर्यटक हेच खातीर येतात. पर्यटनाक लागून आमकां येणावळ मेळटा. राज्याच्या कारभाराचें वजें ल्हव जाता. खण उद्देगाचो जागो आतां पर्यटनान घेतला. पयसो मेळटा, पूण ताचेच वांगडा वायट गजालीय मनांत नासल्यो तरी स्विकारच्यो पडल्यात. हालींच कळंगूटे एका पर्यटकाचो खून जालो, ही तातूंतलीच एक भयंकर गजाल.
आंध्र प्रदेशाचो भोला रवी तेजा (28) हो पर्यटक आनी ताचे कांय इश्ट कळंगूटे एका शॅकांत जेवपाक गेल्ले. मध्यानरात जाल्ली. तांणी आनीक जेवण मागलें. तेन्ना कामगारांनी सांगलें, रांदची कूड बंद जाली. हाचे वयल्यान पर्यटकांनी कामगारां कडेन वाद घालो. उपरांत मारामारी. शॅकाचो धनी, ताचो पूत आनी दोगां कामगारांनी पर्यटकांक बडयले. त्या वेळार भोलाचे तकलेर दांडो बसलो. पुलिसां कडल्यान मेळिल्ली ही म्हायती. उपरांत जखमींक भलायकी केंद्रांत व्हेले तेन्ना भोलाक मरण आयिल्ल्याचें दोतोरांनी सांगलें. आतां पुलिसांनी शॅक धनया सयत तिगांक अटक केल्या. दोनूय गटांनी एकमेकांक बडयले आसूं येता. एकलो मेलो वा कोणूय गंभीर जखमी जालो जाल्यारूच तें उजवाडाक येता. नाजाल्यार थळावे सोडल्यार ह्या कानाची खबर त्या कानाक कळना. असल्यो मारपेटीच्यो घडणुको दर्यावेळांचेर सदांच जातात आसतल्यो. सगलीच चूक शॅक धनयांची आसची ना, पर्यटकूय मस्ती करपाक फाटीं नात. ताकाच लागून आतां दरेका वेवसायिकाक बावंन्सर दवरचे पडटात. पर्यटकांक लुटपाच्योय घडणुको दर्यावेळांचेर घडल्यात. वळ येयसर मारपेट जाल्या. सोशल मिडियाचेर वादग्रस्त, वायट घडणुको पावल्यो काय मागीर गोंयचें नांव बदनाम जाता, हें वेगळें सांगपाक नाका. तेन्ना सरकारी यंत्रणेन 24 वरां सादूर रावपाची गरज आसा.
कळंगूट दर्यावेळे वयल्या वातावरणाचेर गोंयच्या मानेस्तांनी हाचे पयलीं प्रतिक्रिया दिल्यात. त्यो वादग्रस्तूय थारल्यात. पूण ते जें कितें उलयल्यात, तातूंत सत्य, तथ्य आशिल्ल्याचो प्रत्यय अदीं मदीं अशे तरेन येत आसता. मरण आयला तो तरणाटो विदेशी आशिल्लो जाल्यार आनीक व्हडलो बोवाळ जावपाचो. कारण ताची दखल देशा भायलीं प्रसार माध्यमां रोखडीच घेतात. तोंडी प्रचार तर ताचे परस चड धोक्याचो. भोला आनी ताचे इश्ट आंध्राचे. म्हणटकच थंय हे घडणुकेची खबर सगल्यांक कळटली. ‘दर्यावेळो पर्यटना’क हें मारक थारूं शकता. बरींच कुटुंबां दर्यावेळांचेर वतात. पयलीं सूर्य बुडून काळोख पातळसर तीं रेंवेंत बसतालीं. आयज स वरां उपरांत वेळेर कितलीं आसतात, ताचो नियाळ घेतल्यार सत्य कळटलें. दरदिसा ‘घुंवळे वखदां विकप्याक धरलो’ अश्यो खबरो येत आसात. कुटुंबीक पर्यटनाच्या नकाशा वयल्यान गोंयच्यो दर्यावेळो पुसून वचपाक लागल्यात, हाचो आमी केन्ना विचार करतले?
म्हायती कितले मेरेन खरी तें कळना, पूण भायल्या प्रसारमाध्यमांनी गोंयांत पर्यटक उणे जाले, कोविडा उपरांतच्या एका वर्सा खूब आयिल्ले, मात आतां सगले श्रीलंका, मलेशिया, लक्षद्वीपाक वतात, अश्यो खबरो येवपाक लागल्यात. हांगा ते कित्याक येनात, हाचीं कारणांय दिल्यांत. सगलेंच म्हारग, विदेशी पर्यटकां खातीरच्या व्हिसा शुल्कांत केंद्रान केल्ली वाड, चड भाडें… देखून पर्यटक दुसरे कडेन वचपाक लागल्यात, अशें चित्र सध्या उबें जालां. काय केलां? कोंकण, मुंबय सरभोंवतणच्या दर्यावेळांचेर गोंयांतले सारकी बोट सफर, बनाना रायड, बलून रायड, नुस्त्याचें जेवण…. सगलें मेळटा. ताचे व्हिडियोय खबरां चॅनलांनी दाखयल्यात. हाचे वयल्यान फुडाराच्या पोटांत कितें दडलां, ताचो अदमास गोंय दर्यादेगां वयल्यान वेवसायिकांनी घेतल्यार बरो. खंयचेच परिस्थितींत गोंयच्या पर्यटनाक धपको बसपाक जायना, हाची खबरदारी आमकां घेवची पडटली. कारण ताचेर तिजोरी भरिल्ली उरता, रोजगार मेळटा, अर्थीक उलाढाल जाता. कळंगूटे आनी हेर कडेन कितें चुकीचें घडटा जाल्यार तें थांबोवपाचो यत्न करुया.