भांगरभूंय | प्रतिनिधी
हरमला दर्यावेळेर काल जें कितें जालें ते थळाव्या लोकां खातीरुच न्हय, तर देशी- विदेशी पर्यटकां खातीरुय धोक्याचें. अमर बांदेकार ह्या तरणाट्याचो प्रजासत्ताक दिसा दर्यावेळेर खून जाला. ह्या प्रकरणांत एका शॅकाच्या कांय कामगारांक पुलिसांनी धरल्यात. 31 डिसेंबराक कळंगुटे अशेच एके घडणुकेंत आंध्रांतल्या पर्यटकाक मरसर मारपेट जाल्ली. गोंयच्या दर्यावेळांचेर दरदिसा बाचाबाची जाता, दर म्हयन्याक एक तरी केस्तांव जाता, वर्साक एकतरी खून जाता, अशें म्हणल्यार कोणाचो पापड मोडपाची गरज ना. गुन्यांवाच्या मळाचेर गोंयची वेगळी वळख तयार जावपाक लागल्या. हाचे आदी ह्याच स्तंभांत म्हणिल्ले प्रमाण, देशांतल्या ह्या धाकटुल्याश्या पर्यटन राज्याक हाचे वायट परिणाम भोगचे पडूं येतात. पयलीं, आतां आनी फुडाराकुय आमी कागदाचेर ‘नंबर वन’ आसत वा कोणूय आमकां तशें प्रमाणपत्र दित, पूण प्रत्यक्षांत परिस्थिती ही अशी आसा. देखून सरकार ते समाज सगल्यांनीच खर पावलां उखलचींच पडटलीं. कारण पर्यटक हें ‘गोंय’चें पोट भरपाचें एकसुरें साधन उरलां. राज्य चलोवपाक पयसो जाय पडटा आनी ते खातीर तिजोरी भरिल्ली आसपाक जाय. खणी बंद आशिल्ल्यान आतां पर्यटन हो आमचो एकमेव आदार उरला, हें मान्य करचेंच पडटलें.
पुलिसांक मेळिल्ले म्हायती प्रमाण, हरमला अमर हो तरणाटो सांजचो दर्यावेळेर पासयेक गेल्लो. थंय एके कडेन कदेलां, खाटी मांडून दवरिल्लीं. चलून वचप्याक आडखळ जावंक नाका, म्हूण ताणें दोन कदेलां मात्शी हालयलीं. इतल्यान ताका शॅकाच्या एका कामगारान हटकिलो. कदेलां काडलीं कित्याक, अशें विचारलें. ताचेर अमरान ताका समजावपाचो यत्न केलो. उपरांत बाचाबाची जाली आनी मागीर कांय खिणां भितर हो वाद मारामारीचेर पावलो. त्या कामगारान आपल्या वांगड्यांक आपयले आनी सगल्यांनी मेळून बडयिल्ल्यान अमर बांदेकाराक मरण आयलें. फाटल्या 28 दिसांनी दर्यावेळांचेर मरण आयिल्ले दोगूय तरणाटे पिरायेची तिशी पसून हुपूंक नाशिल्ले. पुलिसांनी दर्यावेळांचेर जावपी सगल्याच मारपेट, केस्तांवांचेर बारिकसाणेन लक्ष दवरूंक जाय. थंय कोण घुंवळे वखदां विकतात, खंडणी घेतात, तवनासपणा करतात, उक्त्यार पियेपंक बसतात तें पळयना जाल्यार हीं प्रकरणां गळ्या मेरेन येतलें. सध्या तीं आयल्यांच! सगल्योच खबरो जाहीर जायनात. ‘गोंयच्यो दर्यावेळा इबाडल्यात, म्हाका थायलॅण्डांतूच आयिल्ले सारकें खिणभर दिसलें’, अशें फाटीं एका धर्मगुरून म्हणिल्लें. तांचीं उतरां सत्य थारत आसात.
दर्यावेळांचे वचप ही गोंयकारांची परंपरा. आतांची न्हय, पुर्तुगेज काळा सावन. घडये ताचेय पयलीं आसत. गोंयकार गीम तापपाक लागलो काय दर्यावेळांचेर न्हावपाक वतात. खारो वारो खावपाक वतात. चड करून सांजवेळा सुर्याचें वत मोव जालें काय. 1970 च्या दशकांत थंय हिप्पीय येवपाक लागले. धांवपळ, गर्दी, बोवाळाक विटून ते येताले. शांतताय सोदपाक. तेन्नाय घुंवळे वखदां आशिल्लीं, मात तांचो आतांचे सारको प्रसार जावंक नासलो. आदलो काळ केन्नाच उलगला. आतां सांजवेळा दर्यावेळेर वचपा सारकें उरूंक ना. खास करून बायल, भुरग्यांक घेवन. तर्र जाल्ले तांबड्यागुंज दोळ्यांचे तरणाटे पर्यटक थंय पावलां मेजतना पळोवंक मेळटात. हातांत बाटल्यो घेवन कांय जाण बशिल्ले आसतात. ‘ड्रग्स जाय गे, ताजें ताजें ड्रग्स’ अशें कोण आड्डत भोंवताय आसतले. कितें करून दवरलां आमी आमच्या दर्यावेळांचें? थळावे तिडकल्यात. शॅकाक परवाने दिवचे पयलीं शॅकधनी, कामगारांची फाटभूंय तपासपाची गरज आसा, कारण हे खून पर्यटन मळा खातीर घातक थारपी आसात, अशें विरोधी राजकी पक्ष म्हणटात. दर्यादेगांचेर ल्हारां आदळटलीं इतल्या लागीं खाटी, कदेलां दवरिल्लीं आसतात. लोकांक, पर्यटकांक भोवपाक मेळना. तातूंत कोणे वाट मेळची म्हूण एक कदेल कुशीक काडली जाल्यार ताचो सोमतोच खून?? आतां हरमला जें जालें, ताचो कोणे भायल्या राज्यांनी, देशांनी प्रचार केलो जाल्यार ताचेर गोंयची बदनामी केली, तो टुलकिटाचो एक वांटो, तो गोंय विरोधक अशें म्हणप चुकीचें थारचेंना?
जे कोण शॅककार दादागिरी करतात, कायदो बोल्सांत आशिल्ले सारके वागतात तांचेर कारवाय करची. अतिक्रमणां करपी, तांकां रवाणेक घेवन जे बसल्यात तांकां सालामार्काची भायरी दिवची. पर्यटकांकूय कायदे पाळीनात जाल्यार सरळ भितर उडोवचे. गोंयाक बदनाम करपी दर्यावेळां वयली ही दादागिरी, दहशत आळाबंदा हाडली ना, जाल्यार हे भस्मासुर जल्माक घालप्यांचेच तकलेर हात दवरले बगर रावचे नात, हें कोणे विसरचें न्हय….. गोबरांतल्यान जिवो जावपी फिनिक्स सुकण्याचो काळ आतां ना. हें कलीयुग!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
