भांगरभूंय | प्रतिनिधी
पणजी, प्रतिनिधी ः दर्यादेग फक्त गोंयचे १५ ते २० टक्के सुवाते भितर आसा. थंयसर घुंवळे वखदां, बलात्कार, मस्ती असल्यो गजाली चलतात. पूण उरिल्ले ८० टक्के गोंय सुरक्षीत आसा. हें ८० टक्के गोंय मुखार व्हरपाची गरज आसा आनी लोकां फुड्यांत मांडपाची आसा. ते आमी केन्ना मांडटले, असो प्रस्न सभापती रमेश तवडकार हांणी केलो.
पणजेच्या इन्सटीट्युट मिनेझीस ब्रांगाझा सभाघरांत आदले उपसभापती शंभू बांदेकार हांची अमृत महोत्सव घडोवन हाडून बांदेकार हांचो भोवमान केलो. हे कार्यावळीचे मुखेल सोयरे म्हण सभापती रमेश तवडकार उलयताले. ५० वर्सां पयलीं पयशांक मोल नासलें. गावपणांक आसलें. घरांत साकर नासल्यार लोक ती शेजार्या गेल्ल्यान हाडटाले. फक्त साकरच न्हय तर तांदळा मेरेन गजाली पावताल्यो. पूण ते वेळार सरकारान न्हय तर गावपण आमकां जगयताले. ही थोर परंपरा आमी फाटीं उडयली देखून आमच्या विचारांत बदल जायना, अशें तवडकार हांणी सांगलें.
जेन्ना हांव आफ्रिकेक गेल्लों तेन्ना आदिवासी जमात आशिल्ल्या खेडेगांवांक भेट दिवपाचो हावेस हांवें उक्तायलो. पूण हे गांव धोकादायक आसात. थंयसर लुटमार सारिकिल्ल्यो गजाली घडटात देखून थंयसर तुमकां भेट दिवपा खातीर परवानगी मेळची ना अशें म्हाका भारतीय दुतावासान सांगलें. म्हज्या मतदारसंघातलो खोतीगांव हो राज्यांतलो निमाणो गांव. थंसयर एका पर्यटकांक कोणीच हात लेगीत लायना, अशें तवडकार म्हणटा.
हाचे वेल्यान कळून येता की दर्यादेग वाठाराचेर जंय १५ ते २५ टक्के गुन्यांवगारी घडणुको घडटात तो धोक्याचो आसातूच. मात उरिल्लो ८० टक्के वाठार जो सुरक्षीत आसा तो लोकां मुखार केन्नाच येवंकना, अशी खंत तवडकार हांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
