भांगरभूंय | प्रतिनिधी
पेडणें : पर्यटन हंगामांत व्हडा प्रमाणांत मोरजी, मांद्रें हरमल ह्या दर्यादेगे वयले खाजगी जमनींतले शॅक वेवसायीक रेस्टॉरंट वेवसायीक १५ मिटर अंतराच्या पलतडीं शेकड्यांनी लाकडी खांटी, मेजां घालून अतिक्रमण करतात. हाका लागून पर्यटकांक मेकळेपणान दर्यादेगेचो आस्वाद घेवपाक मेळना.
हे विशीं मांद्रेंचे आमदार जीत आरोलकार हांकां विचारलें तेन्ना जे अतिक्रमण करून वेवसाय करतात, तांचेर खर कारवाय करपाची गरज आसा. पर्यटन खात्याच्या मंत्र्यानीय अशे तरेच्यो सुचवण्यो अधिकार्यांक दिल्यात. अधिकार्यांनी ह्या दर्यादेग वाठारांत उदका वांगडा जे कोण लाकडी खांटी, लाकडी मेजां, कदेलां घालून अतिक्रमण करतात. तांचेर कारवाय करची, हो प्रकार आडावपा खातीर फकत सरकारानूच न्हय तर थळाव्यो पंचायती, थळावे नागरीक, थळावे वेवसायीक हांणीय हातूंत लक्ष घालून जे कोण अतिक्रमण करतात तांकां समजावन सांगचें, अशी सुचवणी आमदार आरोलकार हांणी केली.
फाटल्या म्हयन्यांत हरमल दर्यादेग वाठारांत अशीच घडणूक घडली आनी सांजवेळार व्हड प्रमाणांत लांकडी खांटी, लांकडी कदेलां, लांकडी मेजां दर्याच्या उदकांत घालपाचो प्रकार घडलो. त्या वेळार थळावो तरणाटो चलतालो तेन्ना ताचो पांय मेजाक लागलो आनी ताणें कदेल मात्शें हालयली. तेन्ना एका बिगर गोंयकार वेवसायीकान ताका बरोच बडयलो आनी ताचो खून केलो. ही घडणूक अजून ताजी आसतना परतून अशें जावचें न्हय. ह्या कारणा खातीर पर्यटन खात्यान दर्यादेगेवेले अतिक्रमण बेगोबेग काडून उडोवचे अशी मागणी जाता.
मांद्रें मतदार संघांतल्या मोरर्जी आश्वें मांद्रे हरमल ह्यो दर्यादेगो पर्यटकां खातीर मुखेल थारतात. दर वर्सा ह्या दयारदेगांचेर लाखांनी देश-विदेशी पर्यटक येतात. हांगा येवपी पर्यटकांचे वेवस्थे कडेन जरी सरकारान आडनदर केल्या तरी हांगचे थळावे सॅक वेवसायीक रेस्टॉरंट, रिसॉर्ट धनी आपापले अर्थीक पद्दती प्रमाण आपल्या गिरायकांक बर्यो सुविधा दितात सरकारून पर्यटन खात्या खाला पर्यटन हंगामांत थळाव्या तरणाट्यांक शॅक वेवसाय घालपा खातीर परवाने दितात.
मात ह्या दयारदेगांचेर लक्ष घातल्यार जंय दर्याचें उदक येता त्या उदका मेरेन हे वेवसायीक लाकडी खांटी, कदेलां, मेजां घालून अतिक्रमण करतात. हाका लागून दर्यादेगेचेर पासयेक येवपी पर्यटकांक, नागरीकांक बरेच त्रास सोंसचे पडटात. हाचेरूय सरकारान आतां लक्ष दवरपाची गरज आसा, अशी मागणी थळावे करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
