भांगरभूंय | प्रतिनिधी
स्टारलिंकच्या वरिश्ट अधिकार्यां कडेन मुख्यमंत्र्यांची चर्चा
पणजी : गांवगिर्या वाठारां सयत दर्यादेग वाठारांत स्टारलिंक कंपनी वतीन हायस्पीड इंटरनेट सेवेची पुरवण जातली. इंटरनेट सेवे सयत राज्यांत डिजीटल सुविधा निर्माण करपाचेर लेगीत चर्चा जाली. स्टारलिंक कंपनीचे वरिश्ट बिजनेस ऑपरेशन्स मुखेली लॉरेन ड्रेयर हांचे कडेन मुख्यमंत्री डॉ. प्रमोद सावंत हांची चर्चा जाली. ह्या वेळार म्हायती तंत्रज्ञान मंत्री रोहन खंवटे हाजीर आशिल्ले.
राज्यांत डिजीटल सेवा उपलब्ध करपा सयत मुळाव्यो सुविधा तयार करपाक स्टारलिंक (स्पेस एक्स) कंपनी इत्सुक आसात. हे विशीं कंपनीच्यो वरिश्ट बीजनेस ऑपरेशन्स मुखेली लॉरेन ड्रेयर हांचे कडेन चर्चा जाली, अशी म्हायती डॉ. सावंत हांणी दिली.
शिक्षणीक संस्था, भलायकी केंद्रां, नुस्तेंमारी तशेंच गांवगिर्या वाठारांत सॅटलायटाचेर आधारीत इंटरनेट सेवेची पुरवण स्टारलिंक वतीन जातली. पर्यटन, मॅरीटायम ऑपरेशन्स आनी आपत्ती वेवस्थापनाच्या कार्यावळींत लेगीत स्टारलिंकच्या सहकार्यान मुळाव्यो सुविधा तयार जातल्यो.
राज्यांत गांवगिर्या वाठारांत इंटरनेट सेवा सारकी ना. आजून लेगीत बरेच कडेन मोबायलाक रेंज मेळना. हाचो फटको शिक्षण संस्था तशेंच भलायकी सेवेक बसता. हे फांटभुंयेर स्टारलिंकान सॅटलायटाच्या आदारान इंटरनेट सेवा दिली जाल्यार गांवगिर्या वाठारांतल्या लोकांक थाकाय मेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
