भांगरभूंय | प्रतिनिधी
तीग जाणां बुडिल्लीं, एकलेक थळाव्यांनी वाटायली
भांगरभूंय । प्रतिनिधी
म्हापशें : कांदोळी दर्यादेगेर पासय मारपाक गेल्ले कडेन ल्हारांच्या नेटार व्हांवून वचून दोगांक मरण आयलें, जाल्यार एकलेचेर जीएमसींत उपचार चालू आसात.
पुलिसां कडल्यान मेळिल्ले म्हायती प्रमाण मुंबयच्यान 14 जणांचो गट गोंयांत भोंवपाक आयिल्लो. तातूंतल्या दोन जाण्टी जोडपी दर्यादेगेर सकाळीं पासयेक गेल्ली. अचकीत व्हड ल्हार येवन तातूंतली तीग जाणां दर्यांत व्हांवून गेलीं. थळाव्यांक म्हायती मेळटाच बेगोबेग एकलेक भायर काडली. तिका जीएमसींत अॅडमीट केली. थळाव्यांक उरिल्लीं दोग जाणां सांपडूंक नात. लायफगार्ड आनी पर्यटक पुलीस युनिटान बुडिल्ल्या दोगांक उदकांतल्यान भायर काडलीं. कांदोळी मुळाव्या भलायकी केंद्रांत व्हेल्या उपरांत थंयच्या दोतोरांनी तांकां मरण आयलां म्हूण जाहीर केलें. प्रकाश (73) आनी हर्षिता दोशी (69) ह्या जोडप्याक मरण आयलें, जाल्यार कल्पना पारेख हांचेर जीएमसींत उपचार चालू आसात. प्रकाश आनी हर्षिता हांची कूड जीएमसीच्या मॉर्गांत दवरल्या. पुलीस फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
