भांगरभूंय | प्रतिनिधी
मंत्री रोहन खंवटेः ह्या सप्तकांत मुख्यमंत्र्यां कडेन बसका
भांगरभूंय । प्रतिनिधी
म्हापशें: कळंगूट आनी बागा दर्यादेग वाठार गोंयच्या पर्यटन मळाचेर म्हत्वाची भुमिका वठयता. ह्या दर्यादेगां सयत सगळ्योच दर्यादेगो मसाज पार्लर, डान्सबार टावट्स, हॉकर्स तशेंच हेर त्रासदिणें गजाली पासून नितळ आनी सुरक्षीत दवरपाचो यत्न पर्यटन खातें करता. ह्या बेकोयदो प्रकारांचेर कारवाय जावची आनी हाची जापसालदारकी खाशेल्या अधिकाऱ्यांचेर दिवची, अशी मागणी मुख्यमंत्र्यां कडेन करतले, अशी म्हायती पर्यटन मंत्री रोहन खंवटे हांणी दिली.
कळंगूटचे डान्सबार आनी टावट्स हांचे आड पंचायत, थळावे लोक आनी आमदार फुडें सरल्यात. ही बरी गजाल. दर्यादेगांचेर चलपी बेकायदो गजालींचेर आळाबंद घालचे खातीर ह्या सप्तकांत मुख्यमंत्र्यां कडेन बसका घेतलों. हे बसकेंत बेकायदो प्रकारांचेर कारवाय करचे खातीर पर्यटन खात्याक पुलिसांची मजत मेळची, अशी मागणी करतले, अशें खंवटे हांणी सांगलें. 365 दीस बऱ्या दर्जाचें पर्यटन जावपाक जाय जाल्यार अश्या गजालींक आळाबंद घालप गरजेचें आसा. गोंयांत 4542 हॉटेलां आसात. तातूंत 80 हजार कुडी आसात. दाबोळी आनी मोपा विमातळा वरवीं उण्यांत उणे 8 लाख पर्यटक गोंयांत येतले. ताका लागून ही हॉटेल वेवस्था फावोशी ना. ताका लागून पर्यटकां खातीर गांवागांवांनी साधनसुविधा निर्माण करचो यत्न पर्यटन खातें करता, अशें खंवटे हांणी सांगलें.
पर्यटक टॅक्सीं खातीर अॅप काडटलेच…
पर्यटक टॅक्सीं खातीर सरकार अॅप काडटलेंच. पर्यटन खात्यान वतीन हो अॅप म्हायती आनी तंत्रज्ञान खातें तयार करता. हो अॅप टॅक्सीकारांक दितले. ह्या अॅप वरवीं मेळपी महसुलांतल्यान टॅक्सीकारां खातीर पेन्शना सयत पांच येवजण्यो तयार करतले. टॅक्सीकारांच्या सुरक्षीत फुडाराचो विचार करतले, तशेंच तांकां तातूंत चड पयशे मेळटले, अशें मंत्री खंवटे हांणी सांगलें.
सनबर्न 27 ते 30 डिसेंबर
सनबर्न महोत्सव आयोजकांची कसलीच थकीत रक्कम दिवपाचो ना. हो महोत्सव गोवन विलेज धरतेचेर आसा. सरकारान असो महोत्सव सुरू करपाचो विचार केल्लो, पूण सनबर्नांनूय अशा महोत्सवाचें आयोजन केलां. हो चार दिसांचो महोत्सव 27 ते 30 डिसेंबर मेरेन चलतलो. तातूंत गोंयचे डीजे आनी संगितकारांक माची मेळटली. तातूंतल्यान तांकां अशे व्हड संगीत महोत्सव आयोजीत करपा खातीर स्वताची बुन्याद निर्माण करपाक उर्बा मेळटली, अशें मंत्री रोहन खंवटे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
