भांगरभूंय | प्रतिनिधी
अामच्या गोंयांत कांय विशय चिरंतन आसात. आवाजाचें प्रदुशण हो तातूंतलोच एक. चार सोदनिबंद जातले, इतलें लिखाण ह्या विशयाचेर वर्स अखेरेक जायत आसता. मात, हाचेर सरकारी यंत्रणेक अजून कांयच उपाय सांपडूंक नात. कारखान्यांतलीं यंत्रां, गाडयो, विमानां, माराण आनी हेर फोग (हो मात्सो संवेदनशील विशय. आमच्याच सणा- परबां वेळार हाचेर बंदी कित्याक, असो युक्तीवाद कांय लोक करतात.) आवाजाचें प्रदुशण करतात. आनिकूय कांय गजाली आसात. पूण, गोंयकारांक सगल्यांत चड सतायता तें संगीताचें प्रदुशण. खास करून दर्यावेळांचेर रातचें वाजपी विदेशी संगीत. रातचीं 10 ते सकाळीं 6 मेरेन अमूक डेसिबल तांकी परस चड व्हडल्यान आवाज करपाक जायना, अशें कायदो सांगता. न्यायालयानूय तसो आदेश दिला. सरकारी यंत्रणांनीय तशी अधिसुचोवणी काडल्या. मात, ती कोणूच पाळिनात, अशें दिसून आयलां. कांय थारावीक सणां वेळार रातीं 12 मेरेन संगीत वाजोवपाक सरकारान मदीं परवानगी दिल्ली. एका दिसाचें समजूं येता. पूण, सांजचीं चार जालीं काय सुरू जाल्लो बोवाळ फांतोडेर चार जायसर चालूच आसता, ताका कितें म्हणपाचें? पयशां मुखार सगलें किंकोत. कायदो पसून!! तशें पळोवंक गेल्यार दिसाचें पसून कान फुट्टले, इतल्या व्हडल्या आवाजांत संगीत वाजोवप चुकीचें.
संगिताक लागून पर्यटक येतात. गजाल सामकी खरी. इल्लें कुट्ट करून वा तोंडांत कितें उडोवन रातभर आपलेच धुंदींत नाचपाची आवड जायत्या जाणांक आसता. तांकां खास करून विदेशी ट्रान्स म्युझीक आवडटा. पूण, हेंच संगीत शांतिकाय सोदपाक आयिल्ल्या पर्यटकांक आवडना. मजा म्हणल्यार हातूंत विदेशी पर्यटक चड आसात. खुद्द कांय वेवसायिकांचेंच हें मत. कळंगूट, कांदोळे, बागा, हणजूण- वागातोर वाठारांत रावपी लोकांक ह्या संगिताचो चड त्रास जाता. ह्या आवाजाच्या प्रदुशणाचेर नियंत्रण दवरपाक खास उपाय येवजण घेवपाचें उतर मुख्यमंत्री डॉ. प्रमोद सावंत हांणी कांय म्हयन्यां फाटी दिल्लें. तरी लेगीत आवाजाचें प्रदुशण मात्तूय उणें जायना, हे खातीर थळावे लोक चड बेजारल्यात. बरें हें संगीत आयकुपा सारकें तरी आसता? तरातरांच्या संगिताचो मोगी आशिल्ल्या व्यक्तींक पसून तें आवडचें ना. फक्त आवाजाचें प्रदुशण, हाचे भायर ह्या संगिताक पाचारपाक मेळचें ना. पुलिसांची गाडी दिसली काय आवाज मात्सो उणो करप आनी मागीर ल्हवूच वाडोवप. कोण विचारपाक आयलोच जाल्यार ताच्या आंगार बावंन्सर सोडप. हे प्रकार दर्यादेग वाठारांत सर्रास चलतात. ताका लागून सहसा कोण संगीत वाजोवप्यांचे वाटेक वचनात आनी गेलेच जाल्यार गाळी वा मार खावन येतात. तेन्ना सरकारी यंत्रणांकूच सामकें प्रामाणीक जावन हाचेर आतां कितें तरी उपाय काडचो पडटलो.
पार्ट्यो दवरून रातभर धुमशेणां घालपी कांय आस्थापनांचेर हाचे पयलीं कारवाय जाल्ली. मात, तरीय तीं सुदारूंक ना. थोडे दीस ओगी रावलीं आनी आतां परतून बोवाळ करपाक सुरवात केल्या. कारण कारवायेची भिरांत उणी जाल्या. सध्या लोकसभा आचारसंहिता लागू जाल्या. ताका लागून पुलीस कारवाय करपाक येतात. मात ताचे पयलीं आनी घडये उपरांत ह्या आस्थापनांक रान मेकळें आसतलें. आवाजाच्या प्रदुशणाचो त्रास ल्हान भुरगीं, सध्या परिक्षा चालू आसात, त्या विद्यार्थ्यांक, जाण्ट्यांक, दुयेंत मनशांक जाता, हें वेगळें सांगपाक नाका. मात खंयचेंच आस्थापन हाचो विचार करिना. सगले जाण मरूं, पूण गल्लो म्हजो भरूं, ही हांची मानसीकताय. मोनजातिकूय आवाजाच्या प्रदुशणाचो त्रास, मनस्ताप जाता. सुकणीं, कांय सावदांचें, सरपटपी जिवांचें, पोशिल्ल्या जनावराचें न्हिदपाचें वेळापत्रक आसता. सूर्य अस्तमलो काय तीं न्हिदतात (खास करून सुकणीं) आनी फांतोड जाली काय जागीं जावन आपल्या कामांक लागतात. मात रातभर जर संगीत वाजत रावलें जाल्यार तांकां कितें भोगता आसतलें, तें तांचें तांकांच खबर. आवाज म्हणल्यार कितें तें हेर लोकांनी नरकासूराचे रातीं अणभवलां आसतलेंच!
मनाक शांती दिवपी, थाकाय दिवपी संगीत उण्या आवाजांत लायलें जाल्यार कोण हरकत घेवचो ना. पूण, दर्यादेगांचेर जाता तें वेगळेंच. ताकाच लोकांचो खर विरोध आसा. विदेशांतल्या तकली शांत करपाक पर्यटक आयले आनी तांच्या कानार असलो बोवाळ पडलो, जाल्यार ते परतून हांगा येतले? हाचो विचार आमी करपाक जाय. हाचो पर्यटनाचेर परिणाम जावपाक दिवंक जायना. सरकारी यंत्रणांनी आवाजाच्या प्रदुशणाचेर विचार करचो….. आनी संबंदीत आस्थापनांनीय!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
