दर्यादेगांचेर जावपी बेकायदेशीर नुस्तेंमारीक आळो घालपाक व्हडीं घेतले भाड्याक

भांगरभूंय | प्रतिनिधी

म्हापशें: दर्यादेगांचेर जावपी बेकायदेशीर नुस्तेंमारीक आळा घालपाक व्हडीं भाड्याक घेतले. बेकायदेशीर नुस्तेंमारी केल्ल्याचें दिसल्यार हीं व्हडीं ते सुवातेर वचून कारवाय करतलीं. नुस्तें वेवसाय विभागान दर्या लागसारची गस्त घटमूट करपाक पांच मोक्याचे सुवातेर भाड्यान घेतिल्लीं ल्हान व्हडीं तैनात करपाचो निर्णय घेतला.
बेकायदेशीरपणान नुस्तेंमारी केल्ल्याचे कागाळींक रोखडोच प्रतिसाद दिवन कारवाय करपा खातीर हो निर्णय घेतिल्ल्याची म्हायती नुस्तें वेवसाय खात्या वतीन दिली.
आमकां परंपरीक नुस्तेंमार्‍यां कडल्यान कागाळी येतात, उपरांत कर्मचारी पाव मेरेन बेकायदेशीर नुस्तेंमारी करपी पळून वतात आनी कितेंच कारवाय जायना. हाका लागूनच हो निर्णय घेवचो पडिल्ल्याचे नुस्तेमारी संचालक शमिला मोंतेरो हांणी सांगलें.
जर वाठारांत थळावीं व्हडीं आसल्यार विभाग अधिकारी आनी पुलीस रोखडीच कारवाय करपाक शकतात आनी नेम मोडपी बोटींक सहज धरपाक शकतात, अशें मोंतेरो हांणी सांगलें. विभागान लघुनौका भाड्यान घेवपाक पयलींच ‘कोटेशन’ मागयिल्ले. मात थळाव्या नुस्तेंमार्‍यां कडल्यान आजूनय प्रतिसाद मेळूंक ना.
हे येवजणे खाला गस्त घालपा खातीर युनिट्स स्थापन करतात. तातूंत हरमल, पेडणें, कळंगुटे, बार्देस, बाणावले, सासश्टी, बायणा, मुरगांव आनी तळपण, काणकोण हांचो आसपाव आसा. हे सुवातेर भाड्याक ल्हान व्हडीं तैनात करतले. आयिल्ल्या चडांत चड कागाळींवेल्यान ह्यो सुवातो निश्‍चीत केल्यात.
३० ते ३८ फूट लांबायेच्या आनी १० अश्‍वशक्तीच्या मोटर्सां वरवीं चलोवपी व्हडीं दर वरा प्रमाण भाड्यान घेतले आनी तांचे कडेन उण्यात उणे दोन वांगड्यांचो ‘क्रू’ आसतलो. दरेका व्हड्यांत विभागान थारिल्ल्या प्रमाण जीवनरक्षक उपकरणां, उजो पालोवपी साधनां आनी हेर अनिवार्य सुरक्षा उपकरणां आसतलीं.
हो उपक्रम दीर्घ काळान दर्यादेगेचे देखरेखीच्या धोरणाचो भाग आसा काय? अशें विचारलें तेन्ना, मोंतेरो हांणी म्हणलें, ही वेवस्था सुरू दवरची काय ना हाचो निर्णय घेवचे पयलीं विभाग एक म्हयनो वा ताचे परस चड काळ ह्या विभागाच्या कार्याचो आढावो घेतले.
मजगतीं, बेकायदेशीर नुस्तेंमारी आडावपा खातीर ड्रोन-आधारीत हवाय देखरेख सुरू करपाची मत्स्य वेवसाय विभागाची येवजण आजूनय अपूर्ण आसा. प्रस्ताव सरकाराच्या मंजुरीची वाट पळयता अशी म्हायती तांणी दिली.