भांगरभूंय | प्रतिनिधी
हालींच आमी संवसारीक समुद्री संघटना दीस मनयलो. पयलो असो दीस 2011 सालांत मनयलें. दर्यावर्दी जावं नाविक दळांत वांटेकार जावपाक धाडस लागता. एक म्हळ्यार पेंवपाक येवंकूच जाय, पूण दर्यांत कसलेंय संकश्ट येत तें सांगपाक जायना. हाका लागून तुमी सदांच सादूर आसपाक जाय. म्हूण तर दर्या आमकां खूब संद दित आसता, पूण आमी ती घेतांच अशें ना. वयर म्हणलां ते प्रमाण दर्या आमकां करियराच्यो बऱ्योच संदी दिता. मर्चंट नेव्ही, नेव्ही, क्रुझर, नुस्तें मारपी बोटी. बोटीं वयलें केटरिंग अशे जायते करियर आमी करूंक शकतात, पूण वयर सांगलां ते प्रमाण तुमकां पेंवपाक तर येवपाकूच जाय खेरीज धाडस आसूंक जाय. मन लेगीत घट्ट आसपाक जाय. कित्याक तर ह्या करियरा भितर कितलेशे म्हयने तुमकां घर दिसपाक कठीण. तेन्ना होम सिकनेस जावं येता. पूण तुमचें मन जर घटमुट आसत तर ह्या गजालींचेर तुमी जैत जोडूं शकता.
मर्चंट नेव्हीचें उदाहरण घेवया. एक म्हळ्यार संसार भोंवडी शक्य जाता, भरपूर पगार. तरणाटे आसतना विज्ञान फाटो घेवन दोतोर वा अभियांत्रिकी फाट्यांक वचप हें वेगळें सांगपाक नाका, पूण मर्चंट नेव्हीचो पर्याय विज्ञान फाट्याचे विद्यार्थी वेंचू शकता. मर्चंट नेव्ही हें करियर दर्यांतल्यान जो माल वता ताचे कडेन संबंद आसता. बोटी खेरीज दर्यांतल्यान वचपाक साधन मेळचें ना. हातून डेक आनी इंजिन अशे दोन भाग येतात. एक नॉटिकल सायन्स आनी दुसरो मरीन अभियांत्रिकी. तुमकां दर्यार काम करपाचें आसा तर नेव्हीच्या संकेतस्थळाक जरूर भेट दियात. ह्या खेरीज जर तुमकां stcw, ccmc, Gpurpose course उपरांत करपाचे आसात तर नूसी अकादमी, चिंचणी हे संस्थेच्या संकेतस्थळाक जरूर भेट दियात. ही एक सरकार मान्य प्रशिक्षण दिवपी खडेगांठ संस्था. दोतोर लिओ बार्न्स हांणी ती सुरु केल्ली. म्हायती घेतले उपरांत हे संस्थेक जरूर भेट दियात. वेर्णा, मुरगांव तशेंच चिंचणी हांगां तांची प्रशिक्षण दिवपाची सुविधा आसा. गोंयांक 105 किमी तर देशाक 7500 किमी इतले लांबायेची दर्यादेग आसा म्हूण तर दर्याचेर काम करपाची आमका चड संद आसा.
मर्चंट नेव्ही हो फांटो भारतीय नेव्हीक जोडिल्लो आसा. देशांतली तशेंच परदेशांतली येरादारी, ती मागीर माल व्हरपी आसूं, तेल व्हरपी आसूं, प्रवासी व्हरपी आसूं, हें सगळे मर्चंट नेव्हीक पळोवचें पडटा. व्यापाराचे नजरेन मुंबय हें अख्ख्या संवसारान महत्वाचें मानतात. दर्यातले येरादारीचे नजरेन आशियाई राष्ट्रां भितर आमचो दुसरो नंबर आसा तर संसारान धावो. मर्चंट नेव्हीन डेक इंजिन तशेच सर्व्हिस फांटे आसतात. आठवी पासून पदवी शिक्षण घेतिल्ल्यांक तांत्रिक, बिगर तांत्रिक फाट्यांनी संद आसा. देशान मुरगांव बंदरा प्रमाण मुंबय, न्हावाशेवा, कोचीन, कांडला, मद्रास, न्यू मंगलोर, पारादीप, तुतिकोरोन, विशाखापट्टण हीं बंदरां लेगीत वेपार करतात.
मर्चंट नेव्हींत वचपाक जाय तर विज्ञान फांटो घेवचो पडटलो. वयर सांगिल्ल्या प्रमाण डेक भागाचो प्रमुख हो कॅप्टन आसता तशी सगळीच जबाबदारी हाचेर आसता. दर्यार बोट वता तेन्ना होकायंत्र पळोवप आनी त्या नुसार चलोवप्याक सुचोवणी दिवप आनी बोट अडचणी शिवाय फुडें व्हरप हें सगळें काम ताचेंच. ताका येरादारीचे सगळे नेम खबर आसूंक जाय, ताचे मजतीक कनिष्ठ सहकारी आसतात. चीफ ऑफिसर, सेकण्ड ऑफिसर अशे वांगडी आसतात.
तुमकां जर ह्या फाट्यान वचपाचें आसा तर बीएस्सी नॉटिकल सायन्स ही पदवी आसूंक जाय. हातून तुमकां एक वर्साचें समुद्रपूर्व प्रशिक्षण घेवचें पडटा. मागीर तुमकां प्रत्यक्ष बोटी वेले प्रशिक्षण दितात. ह्या वेळार तुमकां स्टायपेंड, भत्तो लेगीत मेळटा. मागीर हेर शिक्षण घेतकीच इंडियन मेरीटायम विद्यापीठाची बी एस सी पदवी मेळटा. ह्या खेरीज डायरेक्टर जनरल ऑफ शिपिंगाची सेकण्ड मॅटची परिक्षा दित जाल्यार तुमकां सर्टिफिकेट मेळटा जें तुमकां सेकण्ड नाजाल्यार थर्ड अधिकारी म्हूण बोटीचेर संद दिता.
ही सगली म्हायती तुमी संकेतस्थळा वेल्यान घेवं शकतात आनी मागीर निर्णय घेवं शकतात. धाडस, आत्मविश्वास आसप हें मुखेल गुण. मागीर जे फाव ते गुण अभ्यासांतल्यान येवं शकतात.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
