भांगरभूंय | प्रतिनिधी
दोन व्हड पाणबुडीच्या कराराचेर म्होर लागपाची शक्यताय
पयल्या प्रकल्पा खाला तीन स्कॉर्पीन पाणबुडी खरेदीची येवजण
मझगांव डाक शिपबिल्डर्स लिमिटेडा वांगडा भागिदारी
खबरां संस्था
नवी दिल्ली : चीनाची वाडपी नौदळाची ताकदीचे फाटभुंयेर भारत फुडल्या वर्साच्या मध्या मेरेन एक लाख कोटी रुपयां परस अदीक रकमेच्या दोन व्हड पाणबुडीच्या कराराचेर म्होर लावपाक शकता. ह्या पाणबुडयां वरवीं उदकांत झूज करपाची तांक वाडटली. सुत्रांनी दिल्ले म्हायती प्रमाण, पयल्या प्रकल्पा खाला तीन स्कॉर्पीन पाणबुडी खरेदी करपाचे आसात. ह्यो पाणबुडी मझगांव डाक लिमिटेड आनी फ्रान्साची संरक्षण कंपनी नेवल ग्रूप मेळून तयार करतले.
संरक्षण मंत्रालयान दोन वर्सां आदीं सुमार 36 हजार कोटींच्या ह्या वेव्हाराक मंजुरी दिल्ली, पूण प्रकल्पाच्या खूबश्या तांत्रीक आनी वेवसायीक बाजूंचेर उलोवणी जावपाक कळाव जाला. दुसरो प्रकल्प सुमार 65 हजार कोटींच्या खर्चान स डिझॅल- इलेक्ट्रीक स्टील्थ पाणबुडी खरेदी करपाचो आसा. मंत्रालयान 2021 त हे खरेदीक मंजुरी दिल्ली.
सुत्रांच्या म्हणण्या प्रमाण, दोनूय वेव्हार फुडल्या वर्साच्या मध्या मेरेन पुराय जातले. जर्मन बोट निर्माते थाईसेनक्रूप मरीन सिस्टम्सान ह्या प्रकल्पा खातीर मझगांव डाक शिपबिल्डर्स लिमिटेडा वांगडा भागिदारी केल्या. ह्या प्रकल्पाक हालींच्या वर्सांतलो सगल्यांत व्हड ‘मेक इन इंडिया’ यत्नांतलो एक मानतात.सुत्रांनी दिल्ले म्हायती प्रमाण जर सगलें येवजणे प्रमाण जालें जाल्यार स्कॉर्पीन प्रॉजेक्टाक फुडल्या वर्साचे सुरवातेकूच निमाणें रूप दितले. वेव्हाराची सगलीं प्रक्रिया पुराय जावपाक 6 ते 9 म्हयने लागपाक शकतात. खरें म्हणल्यार ह्या प्रॉजेक्ट 75 इंडिया खाला स स्टिल्थ पाणबुडींची खरेदी करपाची सरकाराची सामकी नवी येवजण आसा. जाल्यार तीन पाणबुडी खरेदी करपाची पयली येवजण आसा. ह्या प्रकल्पा खाला मझगांव डाक लिमिटेडान नेवल ग्रुपाच्या पालवान आदींच स स्कॉर्पीन बाणबुडी तयार केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
