भांगरभूंय | प्रतिनिधी
पणजीः अंदूं गोंयचे शिमे भितर दर्यांत बेकायदो नुस्तेंमारी करपी ४ ट्रोलरांचेर नुस्तेंमारी खात्यान कारवाय करून तांकां १३ लाख परस चड दंड दिला. ह्यो चारूय बोटी मालपें उडपीच्यो. भायल्यो बोटी गोंयात येवन नुस्तेंमारी करपाचेर नियंत्रण दवरपा खातीर खातें दर्यांत पाळत दवरता, अशी म्हायती नुस्तेंमारी खात्यान दिल्या.
कुडतरेंचे आमदार आलेक्स रेजिनाल्ड लोरेन्स हांणी विधानसभेंत विचारिल्ल्या प्रस्नांक लेखी जाप दितना नुस्तेंमारी मंत्री निळकंठ हळर्णकार हांणी ही म्हायती दिल्या. अंदू वर्स २०२४-२५सांत ओक्टोबर ते नोव्हेंबर २०२४ मजगतीं गोंयच्या दर्यांत नुस्तेंमारी करपी चार बोटींचेर कारवाय जाल्या. २०२३-२४ वर्सा कसलेच उल्लंघन जावंक ना.
०५ ऑक्टोबर २०२४ वेर श्री कृष्णा प्रसाद हे बोटीक गोंयच्या दर्यांत बुल ट्रोलींग करतना धरून ताच्या धनयाक ३.०३ लाख इतलो दंड दिला, तशेंच त्याच दिसा ५ आॅक्टोबर २०२४ त श्री लक्ष्मिप्रिया ही बोट गोंयच्या दर्यांत बुल ट्रोलींग करताली आनी ती धरून ताच्या धनयाक ३.२३ लाख इतलो दंड दिला. जाल्यार ३ नोव्हेंबर २०२४ वेर श्री शिव प्रभा ही ट्रॉलर गोंयच्या दर्यांत नुस्तेंमारी करताले तें नदरेक पडतकत ताचेर कारवाय करून ताच्या धनयांक ३.८६ लाख इतलो दंड दिलो. जाल्यार ह्याच दिसा ३ नोव्हेंबराक शिव मोधाका हे ट्रॉलरीक गोंयच्या दर्यांत नुस्तेंमारी करतना धरली आनी ताच्या धनयाक २.९३ लाख मेरेन दंड दिलो.
राज्याचे शिमे भितर आशिल्लें दर्या खातें नेमान पाळत दवरता आनी गोंय दर्या नुस्तेंमारी नियंत्रण कायदो १९८० आनी नेम १९८२ खाला नेम मोडटल्यांचेर कारवाय करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
