भांगरभूंय | प्रतिनिधी
पणजी : गोंयच्या दर्यादेगांचेर पालव दवरप्यांक दर्याच्या उफेवपी ल्हारांक पळोवन दर्यांत देंवपाची इत्सा जाले बगर रावना. ते मागीर सुचवण्यो दिवपी पुलीस, दृष्टीचे जीवरक्षक कोणाक आयकनात. ते सरळ उदकांत देंवतात. हे दर्यादेगांचेर येवपी जायते प्रयटक सोर्याचे घुंवळेंत आयिल्ले आसतात. सोर्याच्या नेटान दर्यांत देंवले उपरांत ते मागीर बुडपाक लागतात आनी जीवाच्या आकांतान ‘जीव वाटयात’ म्हूण बोवाळ करतात. गोंयच्या विंगडविंगड दर्यादेगांचेर अशेच दर्यांत बुडटल्या 19 जाणांक दृष्टी मरीन लायफसेव्हर्सांनी वाटयल्यात. तातूंत 9 रशियन नागरिकांचो आसपाव आसा.
ह्या बुडटल्यांक वाटयले
दुष्टीन हे विशीं सविस्तर म्हायती दितना सांगलें, पयले घडणुकेंत पाळोळ्यां दर्यादेगांचेर कर्नाटकांतले 21 वर्सांचे तरणाटे आनी दोन वांगडी सुरक्षा सुचवण्यां कडेन आडनदर करीत दर्यांत देंवले. उपरांत ते नेटान प्रवाहांत खोल उदकांत ओडत गेले. जेटस्कीचेर आशिल्लो समीर काणकोणकार हांचे मजतीन जीवरक्षक विकास मेहता हांणी रेस्क्यू ट्युबाचो वापर करून तांकां दर्यादेगेर हाडले.
दुसरे घडणुकेंत बटरफ्लाय दर्यादेगेर, गुजरातांतलो 25 वर्सां पिरायेचो तरणाटो फोटो खातीर पोज दितना ‘रिप करंट’त आडकलो. जीवनरक्षक शेखर वेळीप हांणी ताका वाटयलो.
तिसरे घडणुकें पाटण्यां 62 वर्सां पिरायेचो एकलो प्रवाहांत पेयतना आडकले उपरांत जीवरक्षक अरविंद गिरिप हांणी ताची सुटका केली.
तशेंच कळंगुटे दर्यादेगेर छत्तीसगडचो 17 वर्सां पिरायेचो आनी उत्तर प्रदेशांतलो 29 वर्सां पिरायेच्या तरणाट्याक जीवरक्षकांनी वाटयले.
जाल्यार कांदोळे दर्यादेगेर चार विवीध घडकणुकांनी 42 वर्सां पिरायेचे रशियन बायलेक, छत्तीसगडच्या 25 वर्सां पिरायेच्या तरणाट्याक आनी 50 ते 59 पिरायेच्या तीन हेर बायलांक वाटावपाक येस आयलें.
बागा दर्यादेगेर दोन रशियन बायलो, कर्नाटकांतलो एक दादलो आनी तामिळनाडूच्या दोगां दादल्यांक वाटयले.
तशेंच, उत्तर प्रदेशांतली चार वर्सां पिरायेच्या चल्याक अपस्माराचो झटको आयले उपरांत जीवरक्षकांनी ताका प्रथमोपचार दिवन हॉस्पिटलांत दाखल केलो.
सिकेरी, मोरजी, दूधसागर हांगाय बचावकार्य केलें. नेटान आयिल्ल्या प्रवाहांत आडकल्ल्या भारतीय आनी रशियन पर्यटकांक वाटयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
