भांगरभूंय | प्रतिनिधी
नॅशनल इन्स्टिट्यूट ऑफ ओशनोग्राफीचो 60 वो वर्धापन दीस मनयलो
पणजी ः शाश्वत उदरगतीचें ध्येय साध्य करपा खातीर दर्यांत चड संशोधन करपाची गरज आसा अशें मत केंद्रीय धर्तरी विज्ञान खात्याचे सचीव डॉ. एम रामचंद्रन हांणी उक्तायलें. शुक्रारा नॅशनल इन्स्टिट्यूट ऑफ ओशनोग्राफीच्या 60व्या वर्धापन दीसा निमतान आयोजीत केल्ले कार्यावळींत ते उलयताले. ह्या वेळार संस्थेचे संचालक डॉ. सुशील कुमार, राष्ट्रीय प्रगत शिक्षण संस्थाचे संचालक डॉ. शैलेंद्र नायक आनी हेर अधिकारी हाजीर आशिल्ले.
संवसारांतल्या 72 टक्के वाठारांचो आस्पाव आशिल्लो हो दर्या मनशांक खूब उपेगी पडटा. हाका लागून आमकां अन्न आनी खनिजां मेळटात. धर्तरेवयलो चडसो ऑक्सिजन सूक्ष्म दर्यांतले जीव तयार करतात. धर्तरेचे हवामान दर्या नियंत्रीत करता. तशेंच पर्यटन, उदका येरादारी, सुरक्षीतताय हांचे खातीरय दर्या उपेगी पडटा. पूण आतां मेरेन मनशान फकत 5 टक्के खोल दर्याचो सोद लायला. ९५ टक्के वाठारांनी अजूनय संशोधन जावपाची गरज आसा अशें डॉ. रामचंद्रन हांणी सांगलें.
ते खातीर दर्याच्या पर्यावरणाचे लुकसाण करीनासतना शाश्वत उदरगत जावंक जाय अशें तांणी सांगलें. दर्याची पातळी वाडत आसा. दर्यांत कोयराचें प्रमाणूय वाडलां. हाचे भायर सुनामी, चक्रीवादळ, भूंयकाप, हुंवार सारकिल्ले सैमीक आपत्तीय घडटात. हे खातीर फक्त भारतांतच न्हय तर आंतरराष्ट्रीय पांवड्यारुय धोरण तयार करपाची गरज आसा. धर्तरी विज्ञान खाते तशेंच एनआयओ करतले तें संशोधन गिन्यानांत भर घालतलें अशेंय रामचंद्रन हांणी सांगलें.
डॉ. नायक हांणी सांगलें, अत्याधुनीक तंत्रगिन्यानाचो उपेग करून दर्यांतल्या साधनांचो सोद घेवपाक जाय. दर्यांत नवी खनिजां मेळपाची शक्यताय आसा. दर्याच्या ल्हारांपसून उर्जा निर्माण करप शक्य आसा. करवत्ती हांगा खाऱ्या उदकापसून गोड उदक तयार करपाचो प्रकल्प सुरु आसा. असो प्रकल्प करपाक सुरवातेक खर्च जाता. पूण हाका लागून फकत धा पयशांनी एक लिटर गोड उदक मेळटा. भारतांत हेर सुवातींनीय अशें प्रकल्प उबारपाक जाय.
ब्लू फ्लॅग प्रमाणपत्र मेळ्ळां असो गोंयांत एकूय दर्यादेग ना…
एकदां दर्यादेगेक ब्लू फ्लॅग बीच प्रमाणपत्र मेळ्ळ्या उपरांत त्या दर्यादेगेचें योग्य संवर्धन सुरू करूं येता. थंय पर्यावरण सांबाळून पर्यटन करप शक्य आसता. हाका लागून रोजगार निर्माण जाता. भारतांत फकत कांय दर्यादेग आसात, जांकां ब्लू फ्लॅग प्रमाणपत्र मेळ्ळां. दुर्दैवान गोंयांत असो एकूय दर्यादेग ना अशें डॉ. एम रामचंद्रन हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
