भांगरभूंय | प्रतिनिधी
डॉ. पांडुरंग फळदेसायः कोंकणी रोमी लिपी लेखकांचें साहित्य संमेलन उमेदीन
भांगरभूंय । खबरां मेज
पणजीः राष्ट्रीय पांवड्यार भारतीय भासांनी जावपी साहित्य रोमी भाशेंत अणकारींत जावपाची गरज आसा. लिपी खातीर कांयच अडना. बऱ्या फुलांचो परमळ संवसारभर परमळता. तेच तरेन कोंकणी रोमी साहित्य फुलूंक जाय. सपनांक खंय सुस्त न्हीद जाय, पूण ध्येय रात जागयता. ते खातीर दर्जेदार लेखन करून रोमी साहित्याचें पोरसूं फुलोवया, अशें डॉ. पांडुरंग फळदेसाय हांणी सांगलें.
दाल्गादो कोंकणी अकादेमीचें 8 वें कोंकणी रोमी लिपी लेखकांचें संमेलन व्हडा उमेदीन जालें. पिलारच्या फादर आग्नेल कला आनी वाणिज्य म्हाविद्यालयांतल्या सभाघरांत ताचें आयोजन केल्लें. ह्या संमेलनाचे सुरवेक मुखेल सोयरे म्हूण थॉमस स्टिफन्स कोंकणी केंद्राचे संचालक डॉ पांडुरंग फळदेसाय हांचे हस्तुकीं दिवली पेटोवन उक्तावण जालें. ह्या वेळार ते उलयताले.
ह्या वेळार अकादेमीचे सचीव फादर मायरन जेसन बार्रेटा, भांडारी आफोंसो ब्रागांझ, अध्यक्षपदार व्हितोरिनो साल्वादोर कुलासो हाजीर आशिल्ले.
समारोप मुखेल सोयरे म्हूण अवर लेडी ऑफ आम्पारो चर्चीचे फादर मान्युएल गोम्स हांणी लेखकांक मार्गदर्शन केलें.
दाल्गादो अकादेमी बरोवप्यांचें संमेलन घडोवन हाडून बरोवप्यांक मान दिता. लेखकांक सांगाताक घेवन रोमी साहित्यांचो वावर फुडें व्हरता. आयचो वाचपी फाल्यांचे फुडारी आनी आयचो बरोवपी फाल्यांचो प्रभावीत नागरीक देखून वाचप आनी बरोवप गरजेचे. ह्या कार्यांतल्यान समाजांत बरेंपण निर्माण जाता.
अशें फादर मायरन जेसन बार्रेटा हांणी येवकार दितना सांगलें.
बरोवपी हो पयलो वाचपी आसता. वाचना वरवीं बरोवपाची ओड निर्माण जाता. बरोवप्यांनी वेगवेगळ्या भाशाचें साहित्य वाचीत रावूंक जाय, असो उलो संमेलनाचे अध्यक्ष व्हितोरिनो कुलासोन मारलो.
ह्या वेळार साबार सत्रांचें आयोजन केल्लें. निबंध, कादंबरी, कथा, कविता ह्या विशयांचेर लेखक विन्सी क्वाद्रुस हांणी पेपर मांडलो. तियात्र, मांडो, दुल्पदां ह्या विशयांचेर डॉ. लुर्इस गोम्स हांणी पेपर सादर केलो. जाल्यार सोद वावराचेर सेनिस्को डायस हांणी पेपर वाचलो केलो. लेखक तोमाझीन कार्दोज हांणी ह्या सत्राचे सत्रसंचालक म्हूण काम केलें. डॉ. ग्लॅनीस मेंडोसा, फादर रोमन रॉड्रिगीस आनी अँथनी मिनेझीस हांणी ह्या विशयांचेर भासाभास केली. दुसऱ्या सत्रांत बाल साहित्य प्रकारांत तरणाच्यांचें योगदान हाचेर फादर जुझे सिल्वेरा आनी बाल साहित्य बरोवप आनी सुचोवणी हाचेर फादर मायरन जेसन बार्रेटो हांणी पेपर सादरीकरण केले. फाऊस्तो व्ही दा कॉस्ता ह्या सत्राचें सुत्रसंचालक आसले. जाल्यार ह्या सत्राचे लेखक विशाल खांडेपारकार, शिक्षिका मेलिसा सिमॉइश प्रा. सेन्सिको डायस हांणी भासभास केली. सुत्रसंचालन सोनिया गोम्स हिणें केलें. विलियम्स फर्नांडीसान आनी आफोन्सा ब्रागांझा हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
