भांगरभूंय | प्रतिनिधी
भांगरभूंय । प्रतिनिधी
पणजीः “दर्जेदार म्हायतीपट निर्मणेची आयज गरज आसा. मनशाक ह्या प्रकारांत पिशें लागपाची गरज आसा तेन्नाच ते गजालीचो व्यासंग तयार जाता. गोंयात कितल्याश्याच विशयांचेर म्हायतीपट काडप शक्य आसा. आमचें गिन्यान मर्यादीत स्वरुपांत उर नासतना तें वाडीक लागचें. म्हायतीपटाचें तंत्र आऩी गरज दरेका भुरग्याक समजुची. हे कार्यशाळेंतल्यान गोंयच्या फिल्म क्षेत्रांत धा जाण सुध्दां मुखार आयले जाल्यार हें फलीत थारतलें” अशें डॉ. प्रकाश पर्येकार हांणी धेंपे कला आनी विज्ञान महाविद्यालय आनी कोंकणी भाशा मंडळ, मडगांव हांणी आयोजीत केल्ल्या एका दिसाच्या राज्य पावंड्या वयल्या म्हायतीपट कार्याशाळेच्या पयल्या सत्रांत उलयना सांगलें.
ही कार्यशाळा सकाळीं 9.45 वरांचेर गोंय विज्ञान केंद्र, मिरामार हांगासर आयोजीत केल्ली. उक्तावण सुवाळ्याक धेंपे धर्मदाय विश्वस्त मंडळाचे प्रशासक राजेश भाटीकार, उद्धाटक डॉ. प्रकाश पर्येकार, प्राचार्य प्रो. डॉ. वृंदा बोरकार, उप-प्राचार्य डॉ. स्वाती पवार, कोंकणी भाशा मंडळाची अध्यक्ष अन्वेषा सिंगबाळ, भारतीय भाशा विभाग मुखेली अंजू साखरदांडे आनी निमंत्रक गौरांग भांडीये माचयेर आशिल्ले.
दुसऱ्या सत्रांत जितेंद्र शिकेरकार हांणी ‘म्हायतीपट संहिता लेखन’ ह्या विशयाचेर मार्गदर्शन केलें. तिसऱ्या सत्रांत साईनाथ उसकयकार हांणी ‘दिग्दर्शन आनी निर्मिती प्रक्रिया’ ह्या विशयाचेर सत्र हाताळ्ळें जाल्यार निमण्या सत्रांत पलाश अग्नी हांणी ‘चित्रीकरण’ ह्या विशयाचेर मार्गदर्शन केलें. सगळीं सत्रां प्रस्न आनी चर्चेच्या माध्यमातल्यान जैतीवंत जालीं.
म्हायतीपट हो पयलें आनी दुसरें वर्स कला शाखेच्या अभ्यासक्रमांत आशिल्ल्यान साबार महाविद्यालयांतले विद्यार्थी आनी शिक्षक व्हडा संख्येन हाजीर आशिल्ले. ह्या वेळार कोंकणी भाशा मंडळ, साहित्य अकादेमी आनी साबार प्रकाशनांनी उजवाडाक हाडिल्ल्या पुस्तकांचें प्रदर्शन मांडिल्लें. ह्या वेळार धेंपे महाविद्यालयाचे विद्यार्थी आनी शिक्षक हाजीर आशिल्ले. कार्यावळीचें सुत्रसंचालन विदिता शेट आनी दिपा रायकार हांणी केलें जाल्यार गौरांग भांडीये हांणी उपकाराचें उलोवप केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
