भांगरभूंय | प्रतिनिधी
पणजी : दरोडो सारकिल्ल्या गुन्यांवांचेर नियंत्रण दवरपाक खर उपाय करतले. बायणाच्या दरोडो प्रकरणांत खर कारवाय जातली अशें मुख्यमंत्री डॉ. प्रमोद सावंत हांणी म्हणलें. उपाय येवजण्यां खातीर मुख्यमंत्र्यांनी वरिश्ठ पातळेत पुलिसांची बसका आपयिल्ल्याची म्हायती सुत्रांनी दिली.
बायणाचे चामुंडी आर्केड इमारतींत मंगळारा रातीं पडिल्ल्या सशस्त्र दरोड्याक लागून पुराय राज्यांत भंयाचें वातावरण निर्माण जालां. गणेशपुरी- म्हापशेंच्या दरोड्याक देड म्हयनो जाता थंय आसा बायणा आनीक एक दरोडो पडलो. कॉंग्रेस, गोवा फॉरवर्ड ह्या विरोधी पक्षांनी सरकाराचेर कायदो सुवेवस्था इबाडिल्ल्याचो आरोप केला.
दरोड्याक चोवीस वरां जावन गेलीं तरी आजूनय खंयच्याच दुबाविताक अटक करूंक ना. बायणा दरोड्याच्या तपासा विशीं आपूण मुख्यमंत्र्यांक मेळटलों अशें आमदार संकल्प आमोणकार हांणी म्हणलें.
उपाय येवजण्यो गरजेच्यो: श्रीपाद
दरोड्यां सारकिल्ले गुन्यांव नियंत्रणांत दवरपाक खर उपाय येवजण्यो करपाची गरज आसा. दिसानदीस गुन्यांवकार वाडतूच आसात. नागरिकांनीय शिटूक रावपाची गरज आसा, अशें केंद्रीय ऊर्जा राज्यमंत्री श्रीपाद नायक हांणी म्हणलें.
तर राज्यांतलो कायदो आनी सुवेवस्थेची स्थिती सामकी इबाडल्या. केंद्रीय गृहमंत्री अमित शहा हांणी हस्तक्षेप करपाची गरज आसा अशें प्रदेश कॉंग्रेस अध्यक्ष अमित पाटकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
