भांगरभूंय | प्रतिनिधी
हालींच एका निवृत्त पुलीस अधिकाऱ्याची मुलाखत पळयली. तातूंत ते सरळ म्हणटात की सध्याच्या पुलिसां मदीं कामाची निश्ठा दिसून येना, आनी तांकां काम करपाकूय नाका. अशें सामान्य लोकांनी उलयत जाल्यार तो आरोप जातलो आशिल्लो, पूण जेन्ना पुलीस सेवेंत काम करून निवृत्त जाल्ले अधिकारी अशें सांगतात तेन्ना तातूंत इल्लें तरी तथ्य आसपाकूच जाय. आसा!
पंद्रशे पयलीं गणेशपुरी म्हापश्यां दोतोराच्या घरांत दरोडो पडलो. तांच्यो भांगराच्यो वस्ती, पयशे आनी हेर सामान चोरून व्हेलें. घरांत घरचीं मनशां आसतना केल्लें हें धाडस गोंयच्या पुलिसांक लजेक पुरो, पूण गोंय केशींचें ‘तपास करपाक’ ‘नंबर वन’ राज्य म्हूण मिरोवपाकूच व्यस्त आशिल्ले आमचे अधिकारी गुन्यांव आडावपाचे यत्न करपाकच सोदिनात हें सिद्ध जाता.
गणेशपुरींत दरोडो पडटकच दुसऱ्या दिसाच्यान पुलिसांनी नाकाबंदी सुरू केली आनी भायल्या राज्यांतल्यान येवपी वचपी गाडयांक आडावंक लागले. पूण कांय दिसांनी ‘लोकांच्या दोळ्यांक उदक लावन’ ही नाकाबंदी बंद केली. कित्याक?
हांवें वयर ज्या निवृत्त अधिकाऱ्याचो उल्लेख केला, ते पुलिसांक कामूच करपाक नाका अशें म्हणटात. आपले ड्युटेचीं वरां जालीं की ते गेले घरा. हे खातीर तपास सारके जायनात आनी गुन्यांव वाडत रावतात. गुन्यांवकारांक पुलिसांचो भंय म्हणटात तो उरलो ना अशेंय ते सांगतात. हालीं तेपार विरोधी पक्षांचे फुडारी लेगीत हेंच उलयतात. पूण ताचें आत्मपरिक्षण करपाचें पुलिसांक पडून गेल्लें ना. ते तपासाच्या ‘नंबर वन’ पुरस्कारांत घुंवळटात.
गणेशपुरींत जे तरेन ‘ऑर्गनायझ्ड’ पद्दतीन दरोडो पडलो, तो पळयल्यार दरोडेखोर, चोर, गुन्यांवकारी पुलिसां परस चार पावलां मुखार आसात हें कोणूय सांगतलो. नाजाल्यार सगले तरेच्यो सुविधा, तंत्रगिन्यान आनी हेर गजाली आसुनूय पुलीस तांकां अजून मेरेन धरपाक कित्याक शकनात?
गणेशपुरींतलो हो दरोडो पडचे आदीं, दोना पावला पणजे ज्येश्ठ नागरिकांच्या बंगल्यार पडिल्लो दरोडो अजून मेरेन कोणें घातलो तें पुलिसांक कळूंक ना. दरोडो घालपी गुन्यांवकारी मोबायल फोन घेनासतना दरोडो घालपाक आयिल्ले काय तांणी ते बंद करून दवरिल्ले. हाचो तरी तपास पुलिसांनी केला? फाटले स म्हयने हे केशीचो तपास लागूंक ना. दरोडो घालपी सांपडूंक नात. मागीर तपासांत ‘गोंय नंबर वन’ कशें तर तें?
दरोडो पडलो आनी दरोडेखोरांनी भांगराच्यो वस्ती, पयशे व्हेले इतलीच ही जखम घरच्या मनशाचेर उरना, पूण हें सगलें करतना जो आतंक ते तयार करतात ताचो भंय सासणाचो तांचे भितर उरता. लोकां मदलो हो भंय काडून उडोवपाक पुलिसां कडेन चिमठीभर तरी कुशळटाय आसा? हाचीय जाप आमच्या निवृत्त अधिकाऱ्या कडेन आसतली. कित्याक तर ते म्हणटात की कुशळ अधिकारी लेगीत काम करपाक सोदिनात. आपल्या हाता सकयल्ले कर्मचारी केन्ना ड्युटेक आयले, केन्ना घरा गेले आनी दीसभर वा रातभर तांणी कितें केलें ताचो हिशोब लेगीत ते घेनात. कित्याक तर अशे आळशी आनी बेजबाबदार कर्मचारी एकाच माळयेचे मणी आसतात.
सगलेच पुलीस बेजबाबदार, भ्रश्ट वा अकुशळ आसतले अशें हांव म्हणिना, कित्याक जे बरे आसतात तांचो तो अपमान थारतलो. घडये बेजबादारांचें भिरें चड जालां आसतलें आनी जबाबदार थोडे. सध्या जे तरेची ‘सिस्टम’ चालू आसा, थंय प्रामाणीक आनी बऱ्या मनशाक वा कर्मचाऱ्याक फुगासांव जाले बगर रावचें ना. अशे ‘सिस्टमींत’ ते रावनात आनी एकोडे पडटात.
पोरूं ऑक्टोबरांत गोंय पुलिसांनी ‘नेत्रा प्रकल्प’ सुरू करून ताचो केशींचो तपास लावपाक फायदो जातलो अशें सांगिल्लें. नेत्रा प्रकल्पा खाला 2500 सीसीटीव्ही नोंद केल्ले. पुलिसांनी न्हय तर, भौसान आपल्या दुकानांच्या भायर वा आस्थापनां भायर बसयिल्ले सीसीटीव्हीची फुटेज वापरपाचो तांचो हेत आसलो. ह्या दरोड्याचे केशींत हो प्रकल्प कितलो फायद्याक पडला ताची म्हायती दिवप गरजेची.
गोंय सरकार कोट्यांनी रुपया पुलीस सेवेचेर मोडटा. हो पयसो करदात्यांचो. ताचो उपेग सारको जावंक जाय आनी जनते खातीर जावंक जाय. हांगां जनता कितली सुरक्षीत आसा हें दरोडे पळयल्यार आनी दिसा उजवाडा जावपी हल्ले पळयल्यार कळटा.
रस्त्या कुशीच्यान चलून वचपी बायलांची मंगळसुत्रां, भांगराच्यो सरपळी चोरपाचे प्रकार चालूच आसात. तेवूय पुलिसांक मेळनात. मेळिल्ले जाल्यार तांचें ‘नॅटवर्क’ सांपडपाचें आनी हे प्रकार बंद पडपाचे. अशें जाल्लें जाल्यार बायलांक सुरक्षीतताय मेळपाची. तशें जाल्लें दिसना, ते खातीर ‘तपासांत नंबर वन’ मानून उपकारचें ना. हे गुन्यांव जावचेच न्हय हे खातीर पावलां मारपाचीं गरज आसा.
पुलीस स्टेशनाचेर कागाळ घेवन येवपी कागाळदाराची कागाळ नोंद करतात, काय ताका ‘आयज यो फाल्यां यो’ करतात, हाचेर वरिश्ठांचें लक्ष आसूंक जाय. कागाळ नोंद करपाक कोणेंय मोबायल, आयफोन, वा आयपॅड मागलो जाल्यार ताचेर खर कारवाय करपाची गरज आसा. नाजाल्यार जे वृत्तीन सुलेमान सिद्दिकीक सोडलो ते वृत्तीक जल मेळटलें आनी पुलीस यंत्रणा आनीकय कोसळटलीं. ती मातयेभरवण जावचे आदींच पावलां मारून ती जाग्यार घालपाची गरज आसा. नाजाल्यार गुन्यांवांचो आंकडो वाडत रावतलो आनी केशीच्यो केशी तपासा विणें पडून उरतल्यो.
पुलिसांक जेन्ना मुख्यमंत्र्यांचे हस्तुकीं मॅडलां आनी पुरस्कार भेटयतात, तेन्ना पळयतल्याक ‘हय ताका हो पुरस्कार फावो आशिल्लो’ अशें दिसपाक जाय. हाची जतनाय दरेक पुलिसान घेवप गरजेची. आपणें लोकांची सेवा करपा खातीर जो सोपूत घेतला तो मोडिनासतना जनसेवेक तांणी ओंपून दिवंक जाय. तेन्नाच त्या पुरस्काराचें जिणेंत मोल वाडपाक शकता.
पुलिसांनी आपूण खंय चुकता हाचेर आत्मपरिक्षण करप गरजेचें. सिद्दिकीक सोडिल्ले ‘प्रवृत्ती’च्या व्यक्तींक हो विचार आवडचोच ना. कित्याक तर तांकां सत्याच्या मार्गार चलपाचेंच आसना. तांचें राहणीमान पळयत जाल्यार तांच्या पगाराचो आनी खर्चाचो अदमास काडूं येता. स्वताचे जिणेंत मनशाक थोडी तरी नाकाबंदी जायच. जंय आपणें स्वताकूच तपासून पळोवंक जाय.
घडये, गोंयांतल्या रस्त्यांचेर सद्दां नाकाबंदी जाताली, जाल्यार भायल्या राज्यांतल्यान चोरपाक वा दरोडो घालपाक येवपी गुन्यांवकारां मदीं भंय निर्माण जावपाचो. तांकांय आतां कळून चुकलां गोंयांत नाकाबंदी फक्त ‘गुन्यांव’ जातकरूच घालतात म्हूण?
संजय बोरकार
99213 43430
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
