भांगरभूंय | प्रतिनिधी
आमदारांक कामां करप शक्य; आमदार थळावो वाठार उदरगत येवजण अधिसुचीत
पणजी : दरेका मतदारसंघांत वर्साक अडेज कोटींचीं कामां करपाची तजवीज आशिल्ली आमदार थळावो वाठारा उदरगत (एमएलए लोकल एरिया डेव्हलपमेंट) येवजण अधिसुचीत जाल्या. भौशीक बांदकाम खात्या वतीन हे येवजणेची कारवाय जातली. रस्ते, गटारां, खेळां मैदान, उदका पुरवण, मसंडभूंय अशीं कामां हे येवजणे खाला आमदारांक करप शक्य जातलें.
खासदारा खातीर एमपी लाड येवजण खूबशा वर्सां सावन सुरू आसा. हेच धरतेर आतां ‘एमएलए लाड’ येवजण गोंयांत चालीक लागतली. कांय वर्सां पयलीं दरेका मतदारसंघांत उदरगती खातीर थारावीक निधी निश्चीत करपाची घोशणा तेन्नाचे मुख्यमंत्री सर्गेस्त मनोहर पर्रीकार हांणी केल्ली. तेन्ना ही येवजण अधिसुचीत जाली ना. आतां दरेका मतदारसंघा खातीर अडेज कोटी रुपयांचो निधी निश्चीत करपी येवजण अस्तित्वांत आयल्या. हे येवजणे खातीर वर्साक 100 कोटींचो निधी लागतलो. निधी खातीरची गरजेची तजवीज अर्थसंकल्पांत आसतली.
हेर सरकारी निधींतल्यान मतदारसंघांतली बारीक सारीक जीं कामां करप शक्य जायना, तीं कामां हे येवजणे खाला जातलीं. लोकांचे गरजे प्रमाण प्राधान्यक्रम थारावन आमदारान विहीत अर्जांत कामाची शिफारस करची पडटली. आमदारान लेटर हेडाचेर सय करून भौशीक बांदकाम खात्याच्या मंत्र्याक प्रस्ताव सादर करप गरजेचो आसा. भौशीक बांदकाम खात्याच्या मंत्र्याची मान्यताय मेळ्ळे उपरांत अदमास तयार करपा खातीर भौशीक बांदकाम खात्याच्या वर्क्स डिव्हिजना कडेन हो प्रस्ताव सादर जातलो. अदमास तयार जाले उपरांत तंत्रीक मान्यताय घेवप गरजेचें आसा. प्रस्तावीत काम लोकांच्या हिता खातीर आसप गरजेचें आसा. व्यक्तीगत काम हे येवजणे खाला घेवपाक मेळचें ना. तशेंच वर्साक अडेज कोटींचे मर्यादेंत येता जाल्यारूच ह्या कामाक मान्यताय मेळटली.
भौशीक बांदकाम मंत्र्याचे मान्यताये उपरांत 10 दिसांत कार्यकारी अभियंत्यांक अदमास तयार करपा सयत कामाचो खर्च, हेर खर्च, कामाचो लाव, कामाचे स्वरूप तशेंच काम पुराय जावपाचो कालावधी सादर करप गरजेचो आसा. कार्यकारी अभियंत्या कडल्यान 15 दिसांत भौशीक बांदकाम खात्याच्या मंत्र्याक अदमास सादर जावप गरजेचो आसा.
समितीची मान्यताय मेळ्ळे उपरांत 8 दिसां भितर कार्यकारी अभियंतो कामाची निविदा जारी करतलो. एका वर्सांत जीं कामां पुराय जातलीं, तींच कामां हे येवजणे खाला घेवपाक मेळटलीं. येवजणे खातीर समितीन मान्यताय दिली काय अर्थीक फांट्या कडल्यान परतून खर्चाक मान्यताय घेवची पडची ना. निविदे परस 5 टक्के चड बोली सादर जाली जाल्यार गोवा स्टेट वर्क्स बोर्डा मुखार प्रस्ताव दवरचो पडटलो. वर्क्स बोर्डान मान्यताय दिले उपरांत प्रस्ताव परतून समिती मुखार दवरचो पडटलो.
उदका पुरवण करपी पायपलायन तशेंच घाणयाऱ्या उदकाच्या पायपलायनीचें काम हे येवजणे खाला करप शक्य जातलें. गटारां, राखणे वणत, फुटपाथ, उक्त्या जाग्याच्या उदरगतीचें काम हे येवजणे खाला करप शक्य जातलें. मसंडभूंय, कब्रस्थान, सभाघर, भौशीक बांयो, ग्रंथालय, शौचालय, पार्कींग शेड, कोयर सांठोवपा खातीर शेड, विज्ञान पार्क, उद्यानाची रोशणाय, शिक्षण संस्थां खातीर प्रयोगशाळा, फर्नीचर हीं कामां करपाची मेकळीक आसा. येवजणे खाला माटव, शामियानाे उबारपा खातीर लेगीत मान्यताय मेळटली. खासगी सुवातींचेर भौशीक कामां करपा खातीर धनया कडल्यान हरकत ना दाखलो घेवचो पडटलो. ‘एनओसी’ घेतले उपरांत कामाक मान्यताय मेळटली.
समितीचे मान्यताये उपरांत कामाक जातली सुरवात
भौशीक बांदकाम खात्याचे मंत्री अदमास तयार जाले उपरांत प्रस्ताव समिती मुखार दवरतले. समितीचे मान्यताये उपरांत कामाक सुरवात जातली. मुख्यमंत्री डॉ. प्रमोद सावंत हांचे अध्यक्षताये खाला मान्यताय दिवपा खातीर समिती स्थापन जातली. भौशीक बांदकाम खात्याचे मंत्री हे समितीचे उपाध्यक्ष आसतले. मुखेल सचीव, अर्थ सचीव, भौशीक बांदकाम खात्याचे सचीव हे समितीचे वांंगडी आसतले. भौशीक बांदकाम खात्याचे प्रधान मुखेल अभियंते हे समितीचे वांगडी सचीव आसतले.
———————-
वर्सा भितर पुराय जावपी प्रकल्पूच मेळटलें घेवंक
आमदार थळावो वाठार उदरगत येवजणेंतल्यान मेळपी निधींतल्यान आमदारांक मतदारसंघांतल्या सगल्या नागरिकांक फायदो जातलो अशींच कामां हातांत घेवंक मेळटलीं. तशेंच 365 दिसां भितर म्हणल्यार वर्सा भितर पुराय जावपी प्रकल्पूच घेवंक मेळटले अशेंय अधिसुचोवणेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
