भांगरभूंय | प्रतिनिधी
मुख्यमंत्रीः डॉ. प्रमोद सावंतः सांखळी मतदारसंघांत पंचायत भोंवडी
भांगरभूंय । प्रतिनिधी
दिवचलः दरेका पंचायत वाठारांत आधुनीक मुळाव्या उदरगती वांगडाच मानवी उदरगत तशेंच आत्मनिर्भर स्वयंपूर्ण गां, पंचायत ही आपली संकल्पना आसा. दरेका पंचान, सरपंचान, उपसरपंचान घराघरांनी वचून लोकांचे प्रस्न समजून घेवचे. केंद्र आनी राज्य सरकाराच्यो विवीध येवजण्यो घराघरांनी पावोवपाचो वावर करचो. दरेक गांव आदर्श रोल मॉडल करचे खातीर भौशीक भलायकी नितळसाण, हरीत- धवल क्रांती हे खातीर विशेश योगदान दिवपाक फुडाकार घेवचो, अशी सुचोवणी मुख्यमंत्री डॉ. प्रमोद सावंत हांणी पंचायत मंडळांक केली.
मुख्यमंत्री डॉ. सावंत हांणी शेनवारा सांखळी मतदारसंघांतल्या सातूय पंचायतींक भेट दिली. सरपंच आनी पंचां वांगडा चर्चा केली. मान्सूनपूर्व कामां पुराय करची, हुंवाराचो धोको आसा थंय गरजेची उपाय येवजण आंखची, तशेंच पंचायतीच्या दरेका प्रभागांत उदरगत येवजण्यो, नियोजीत कामां पुराय करचे खातीर पावलां उखलप, आत्मनिर्भर तशेंच स्वयंपूर्ण पंचायत करचे खातीर चालीक लायिल्ले उपक्रम हांचो नियाळ घेतलो.
स्वयंपूर्ण गांव, पंचायत तशेंच दरेका हाताक काम हे खातीर सरकार वेगवेगळ्या माध्यमांतल्यान वावर करता. दरेका गांवांतली पडीक शेतां लागवडी खाला हाडात, सामुहीक शेती करात, दूद उत्पादन, फलोत्पादन आनी हेर सगळ्या उपलब्ध साधनांचो वापर करून हरीत- धवल क्रांती वांगडाच स्वयंरोजगार, आत्मनिर्भर गांव करचे खातीर विशेश लक्ष दिवचें, अशी सुचोवणी मुख्यमंत्र्यान पंचायत मंडळांक केली.
न्हावेलीचे सरपंच कालिदास गांवस, पाळी कोठंबीचे सरपंच शिवा मुळगांवकार, सुर्लाची सरपंच विश्रांती सुर्लकार, आमोणेंचे सरपंच कृष्णा गांवस, वेळगेंची सरपंच सामंता कामत, कुडणेंचे सरपंच राजन फाळकार, हरवळेंचे सरपंच राजू मळीक, सातूय पंचायतींचे सगळे पंच तशेंच मंडळ अध्यक्ष गोपाळ सुर्लकार, सचीव हांचे कडेन उदरगत तशेंच हेर बाबतींत नियाळ घेवन मुख्यमंत्र्यान चर्चा केली.
ह्या वेळार सगळ्या सरपंचांनी तशेंच पंचांनी गांवांतल्यो समस्या, नियोजीत उदरगतीचीं कामां हे संबंदांत आपल्यो सुचोवण्यो आनी प्रस्ताव मांडले. रस्त्या कुशीक कोयर उडोवपाचे प्रकार वाडल्यात. पंचायत मंडळांनी ते संबंदांत जागृताय करून रस्त्याचे कुशीक वा मेळत थंय कोयर, प्लास्टीक कोयर उडोवप्यांचेर कारवाय करपाची मुख्यमंत्र्यान सुचोवणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
