भांगरभूंय | प्रतिनिधी
दामू नायक भाजपाचे नवे प्रदेशाध्यक्ष, सुनील बन्सल हांचे कडल्यान घोशणा
भांगरभूंय । प्रतिनिधी
पणजीः प्रदेश भाजपाचो दरेक कार्यकर्तो हो प्रदेशाध्यक्षूच आसा. ह्या सगळ्या कार्यकर्त्यांक वांगडा घेवन फुडल्या काळांत पक्षाचें संघटन आनीक वाडोवपाचो आनी फुडरांतल्यो सगळ्यो वेंचणुको जिखपाचो ठाम विस्वास भाजपाचे नवे प्रदेशाध्यक्ष दामू नायक हांणी उक्तायलो.
पणजेच्या गोमंतक मराठा समाजाच्या सभाघरांत शेनवारा आयोजीत कार्यावळींत भाजपाचे राष्ट्रीय सरचिटणीस सुनील बन्सल हांणी दामू नायक हांची प्रदेशाध्यक्षपदा खातीर निवड जाल्ल्याची घोशणा केली. ह्या वेळार मुख्यमंत्री डॉ. प्रमोद सावंत, केंद्रीय मंत्री श्रीपाद नायक, राज्यसभा खासदार तशेंच अस्तमते प्रदेशाध्यक्ष सदानंद शेट तानावडे आदले खासदार विनय तेंडुलकार, सरचिटणीस नरेंद्र सावयकार हांचे सयत पक्षाचे हेर फुडारी, मंत्री, आमदार हाजीर आशिल्ले.
आतां मेरेन भाजप प्रदेशाध्यक्षपदाची जापसालदारकी सांबाळिल्ल्या दरेका फुडाऱ्यान पक्षाक गोंयांत घटसाण मेळोवन दिलां. तेच पद्दतीन फुडल्या काळांत प्रदेशाध्यक्ष ह्या नात्यान आपूण सगळ्यांक वांगडा घेवन पक्षाचें संघटन आनीक वाडयतलों. नवे कार्यकर्ते तयार करुंया आनी येता त्या काळांतल्यो जिल्हो पंचायत, पालिका आनी विधानसभा वेंचणुकोय भोवमतान जिखुया, अशें दामू नायक हांणी सांगलें.
संवसारांतलो सगळ्यांत व्हड पक्ष आशिल्ल्या भाजपाच्या प्रदेशाध्यक्षपदाचेर आपल्या सारक्या एका सामान्य कार्यकर्त्याची निवड जावप हो आपले जिणेंतली खूब व्हड खोशी आसा, अशें तांणी सांगलें.
प्रदेश भाजपाक घटमूट करपाक हे आदींच्या सगळ्याच प्रदेशाध्यक्षांचो व्हड वांटो आसा. भाजप कार्यकर्तो केन्नाच आदलो जायना. तो कायम सक्रीय आसता. अश्या सगळ्या कार्यकर्त्यांक वांगडा घेवन आपूण पक्षाक येस मेळोवन दिल्ल्याचें अस्तमते प्रदेशाध्यक्ष सदानंद शेट तानावडे हांणी स्पश्ट केलें. सरकाराक घटमूट करचे खातीर आमदारांची खर गरज आसता. हेच खातीर काँग्रेसीच्या 18 आमदारांक आमी भाजपांत प्रवेश दिलो. भाजपांत प्रवेश केले उपरांत ह्या सगळ्याच आमदारांनी भाजपाची विचारधारा आपणायली, अशें तानावडे हांणी सांगलें. नव्यान निवड जाल्ले प्रदेशाध्यक्ष दामू नायक सगळ्या कार्यकर्त्यांक वांगडा घेवन येता त्या काळांत पक्षाक आनीक येस मेळोवन दितले, असोय विस्वास तानावडे हांणी उक्तायलो.
नेतृत्वाचेर श्रद्धा दवरातः सुनील बन्सल
अंदूं फकत दोन म्हयन्यांत भाजपाचे देशभरांत 13 कोटी मुळावे वांगडी जाल्यात. 8 ते 10 वर्सां आदींच भाजप फकत देशांतलो न्हय जाल्यार संवसारांतलो सगळ्यांत व्हड पक्ष थारला. तेच खातीर देशभरांतले खूबशे फुडारी, कार्यकर्ते भाजपा कडेन जुडल्यात. अश्या पक्षाचे प्रदेशाध्यक्ष जाल्ले दामू नाटक आपल्या पदाक निश्चीत न्याय दितले, अशें सुनील बन्सल हांणी सांगलें. ‘भारत माता की जय’ ही भाजपाची विचारधारा कार्यकर्त्यांनी सांगाळप आनी नेतृत्वाचेर श्रद्धा दवरप गरजेचें आसा, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
