भांगरभूंय | प्रतिनिधी
पालक, शिक्षकां कडेन ऑनलायन संवाद
सांखळेच्या ग्रीन स्कुलाक भेट दिवपाचो उलो
सरकारी शाळांनी पटसंख्या वाडिल्ल्याचो दावो
भांगरभूंय । प्रतिनिधी
पणजी : गोंयांतल्या कांय मुळाव्या शाळांनी एक वा दोन शिक्षक आसात. टीईटींतल्या तांत्रीक कारणाक लागून शिक्षक भरती कांय काळ बंद आशिल्ली. मात आतां ती परतून सुरू केल्या. प्रक्रिया पुराय जाले उपरांत दरेके शाळेक उण्यांत उणे चार शिक्षक दितले, अशें मुख्यमंत्री डॉ. प्रमोद सावंत हांणी सांगलें. शेनवारा तांणी मुल्यवर्धन 3.0 खाला गोंयभरांतल्या पालक, शिक्षक आनी विद्यार्थ्यां कडेन ऑनलायन पद्दतीन संवाद सादलो. ह्या वेळार तांणी शिक्षण मळा वयल्या विवीध विशयांचेर मार्गदर्शन केलें.
गोंयांतल्यो मराठी मुळाव्यो शाळा सरकारान बंद केल्ल्याचो आरोप जाता. प्रत्यक्षांत पालकांनी तांच्या भुरग्यांक शारांतल्या वा अनुदानीत शाळांनी धांडप सुरू केलें. ताका लागून सरकारी शाळेंतली पटसंख्या उणी जावन निमाणे कडेन त्यो बंद जाल्यो, अशें मुख्यमंत्र्यान सागलें.
डॉ. सावंत हांणी सांगलें, सरकारान पोरण्या मुळाव्या शाळांची दुरुस्ती केली. गरजे प्रमाण नुतनीकरण लेगीत केलां. कांय कडेन लागींच्या दोन शाळांनी पटसंख्या वा शिक्षकांची संख्या उणी आशिल्ल्यान तांचें एकत्रीकरण केलें. कारापूर सांखळे सरकारान तयार केल्लें ग्रीन स्कूल आदर्श थारलां. हे शाळेक सगल्यांनी मुजरत भेट दिवची. कांय सरकारी मुळाव्या शाळांनी यत्ता पांचवी ते आठवी मेरेनचे वर्ग घेवपाक परवानगी मागल्या. हाचोच अर्थ सरकारी शाळांनी लेगीत पटसंख्या वाडटा, अशें तांणी सांगलें. सरकारान 6 वर्सां आदीं मुल्यवर्धन उपक्रम सुरू केल्लो. ते प्रमाण यत्ता पयली ते आठवीच्या विद्यार्थ्यांक मुल्य शिक्षणाचे धडे दितात. आतां मेरेन गोंयांतल्या 450 शाळांतले 80 हजार विद्यार्थी आनी 2700 शिक्षकांक ह्या उपक्रमांत वांटेकार करून घेतल्यात. असो उपक्रम चालीक लावपी गोंय देशांतलें पयलें राज्य थारिल्लें. आतां हेर राज्यांनीय हो उपक्रम सुरू केला. मुल्यवर्धन 3.0 खाला विद्यार्थ्यांक कोयर वेवस्थापन, वैयक्तीक नितळसाण, रस्तो सुरक्षा आनी योग हे चार नवे विशय शिकयतले. जापसालदारकी, आदरणीय नागरीक जावचे खातीर मुल्यवर्धन शिक्षण गरजेचें आसा, अशेंय मुख्यमंत्री डॉ. प्रमोद सावंत हांणी सांगलें.
‘विद्यार्थ्यांक मारचे न्हय’
कांय दिसां आदीं शिक्षकांनी विद्यार्थ्यांक मारपाच्यो घडणुको घडिल्ल्यो. एक शिक्षण मंत्री ह्या नात्यान आपल्याक ताचें खूब वायट दिसता. शिक्षकांनी विद्यार्थ्यांक मारिनासतना तांकां मोगान समजावन सांगचें. शिक्षण हें हासत खेळत जावपाक जाय, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
