भांगरभूंय | प्रतिनिधी
वाळपय : गोंय वैजकी महाविद्यालयांतले दोतोरांचेर चुकीचे पद्दतीन निलंबीत जावपाचो वेळ आयला. हाका लागून आतां जायते प्रस्न निर्माण जाल्यात. अशी स्थिती परत येवची न्हय म्हणून सरकारान हाचेर उपाय म्हणून दरेका सरकारी कार्यालयांत कागाळ सोडोवपाचो विभाग स्थापन करचो, अशें सत्तरींले समाजीक कार्यकर्ते अॅड.. शिवाजी देसाय हांणी मुख्यमंत्री डॉ. प्रमोद सावंत हांकां ई-मेल केल्ल्या निवेदनांत म्हणलां. मजगतीं, डाॅ. सावंत हांणी हें निलंबन जावचें ना, अशें स्पश्ट केलां.
सरकारान दरेका सरकारी हॉस्पिटलांत कागाळ सोडोवपाक विभाग स्थापन करप सामको गरजेचो. ह्या विभागाक लागून नागरीक, दुयेतींच्यो समस्या, हॉस्पिटल वा दोतोरां विशींच्यो कागाळी आसतल्यो त्यो सोडोवच्यो. विभागांत स्वतंत्र कर्मचार्यांचो पंगड आसचो. दरेके कागाळ स्वातंत्र पद्दतीन तो पंगड सोडयतलो आनी ताचेर आपलो अहवाल सादर करतलो. कशे तरेन कागाळी सोडोवच्यो, हे विशीं मार्गदर्शक तत्वां आनी कालमर्यादा थारावची. हातुंतल्यान दुयेतींक, दोतोरांकूय सुविधा मेळटल्यो, अशेंय निवेदनांत म्हणलां.
हॉस्टिपलाचीं सुधारणां आनी उपाय करपाक मेळटले हे विशींय दुयेंती, नागरिकां कडल्यान हो पंगड सुचवण्यो घेतलो. तशेंच दोतोर, दुयेंती मदीं योग्य संवाद सादपाचो तिणें यत्न करचो. ह्या पंगडा वरवीं दोतोर आनी हॉस्पिटल स्टाफ तशेंच दुयेंती, नागरीक हांचे खातीर मार्गदर्शन कार्यावळींचें आयोजन करचें, अशेंय तांणी म्हणलां.
गोंय हें हेर राज्यां परस खूब ल्हान. भलायकेच्या मळार मुख्यमंत्र्यांनी स्वता लक्ष दिवचें. मुख्यमंत्र्यांनी दोतोराच्या निलंबनाचो आदेश फाटीं घेवन, फुडें जावपी परिणाम पयस केल्यात. हे खातीर तांचे उपकार. मात अशें परत केन्नाच जावचें न्हय. वांगडा भलायकी मळा विशींच न्हय तर हेर सरकारी कार्यालयां विशींय अशें जावपाक जायना. हे नदरेन मुख्यमंत्र्यान उपाय काडचे. सरकारी अधिकारी खंयचोय आसूं, ताका ताची बाजू मांडपाचो अधिकार आसा. तशेंच कागाळदाराकूय आसा. कागाळ सोडोवपाची पंगड स्थापन करून हें आमी सगळें वेवस्थीतपणान सांबाळून घेवपाक शकतात. हाका लागून दोतोरांवेलो ताणूय उणो जातलो, अशें अॅड. देसाय हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
