भांगरभूंय | प्रतिनिधी
मुख्यमंत्री : काणकोणां 14 घरांच्या कामाचो शुभारंभ
काणकोण: रमेश तवडकरांनी संकल्प केल्ल्या दरेका घरांक सरकाराची तशेंच आपली व्ययक्तीक मजत मेळटली. लायट, उदक, घर ह्यो सगळ्यो सुविधायो पुराय करपाक काणकोण म्हाल सगळ्यांत फुडें आसतलो. फुडलीं 4 वर्सां काणकोणचो एकूय व्यक्ती फाटीं उरचो ना, हाचेर तवडकार हांणी भर दिल्या. काणकोणची चडशी उदरगत जाल्या. तवडकार हांणी जें व्हिजन दवरलां ताका आपलें पुराय सहकार्य आसा, अशें मुख्यमंत्री डॉ. प्रमोद सावंत हांणी सांगलें.
सभापती रमेश तवडकार हांणी बलराम चेरिटेबल फावन्डेशना वतीन काणकोणां 14 गरिबांचीं घरां बांदून दिवपाचो संकल्प केला. मुख्यमंत्री डॉ. सावंत हांचे हस्तुकीं ह्या घरांचो बुन्यादी फातर बसयलो. उपरांत गायतोंडे खेळां मैदानाचेर ह्या कमाचो दिवली पेटोवन शुभारंभ केल्या उपरांत मुख्यमंत्री उलयताले.
गोंयांत ध्येय, धोरण नाशिल्ले पक्ष आसात. वेंचणुके वेळार ते येतात आनी उपरांत नाच्च जातात. ध्येय धोरण नाशिल्ल्यान ते पक्ष तिगूंक ना. पूण भारतीय जनता पार्टी सतत ह्या धोरणाचेर चलता. ते भायल्यान आयिल्ले आनी फामादूय जाले. पूण थळाव्यांचे प्रस्न जे तरेन सोडोवपाक जाय आसले ते तांचे कडेन सोडोवपाक जावंक ना. ही परिस्थिती आसा. स्वयंपूर्ण मित्र हे संकल्पने खाला नागरिकांच्यो समस्या सोडोवपाचें काम करतलों. विमा दिवप, घरांचे प्रस्न सोडोवप, अश्यो 121 येवजण्यो गोंयांत सुरू आसात. लायट ना, उदक ना, घर ना अश्यो समस्या फुडें आसच्यो ना. गांवचे प्रस्न सोडोवपा खातीर गांवच्या जागृत नागरिकांनी भाजपा कार्यकर्त्यांक समस्या सोडोवपाक सहकार्य करचें, अशें मुख्यमंत्री डॉ. प्रमोद सावंत हांणी म्हणलें.
ह्या वेळार माचयेर प्रदेशा अध्यक्ष सदानंद शेट तानावडे, सभापती रमेश तवडकार, आदले खासदार अॅड. नरेंद्र सावयकार, दामोदर नायक, सचीव सर्वानंद भगत, मंडळ अध्यक्ष विशाल देसाय, सरपंच आनंदू देसाय, नगरसेवक सायमन रिबेलो, सरपंच फातिमा रोड्रिग्स, सविता तवडकार, सारा देसाय, सेजल गांवकार, प्रतिजा बांदेकार, नगरसेवक नादीन फर्नांडीस, गंधेश मडगांवकार, सुप्रिया देसाय, नीतू देसाय, विंदा सतरकार, उपजिल्हाधिकारी रमेश गांवकार, मामलेदार मनोज कोरगांवकार, रवी बीजे, श्रीकांत ओगाडी हाजीर आशिल्ले.
रमेश तवडकार हांणी, देशाचे प्रधानमंत्री नरेंद्र मोदी आत्मनिर्भराचें सपन पळयता. ही तोखणाय करपा सारकी गजाल. आमचे मुख्यमंत्री डॉ. प्रमोद सावंत हांणी गोंयची उदरगत करपाचो ध्यास घेतला. पक्षाचे प्रदेशाध्यक्ष नेटान काम करतात. 2030 चें काणकोण उदरगत जाल्लें काणकोण आसतलें. प्रधानमंत्री, मुख्यमंत्री दरेकल्याक आत्मनिर्भर करपाचो विचार करतात. जाल्यार आमी काणकोणकारांचो विचार कित्याक करचो न्हय. हीं 14 घरां दोन म्हयन्यांनी पुराय जातलीं. फुडें भलायके विशींय विचार करतलों. आयज आमी मनीसपण विसरल्यात. अश्या वेळार आमी नागरीक म्हणून हेरांचीं दुकां पुसपाक जाय. ताका लागून आपणें ही संकल्पना फुडें व्हेल्या, अशें तांणी सांगलें.
सदानंद शेट तानावडे हांणी, देशांत 12 टक्केच लोक गरीब रेशोंत आसात. ह्यान पयलीं हो आंकडो 22 टक्क्यांचेर आशिल्लो. गोंयांत केंद्र सरकाराची व्हडा प्रमाणात मजत मेळटा. ही खोशयेची गजाल. गोंयच्या हेर आमदारांनीय ही येवजण राबोवची, असो उलो तांणी मारलो.
नरेंद्र सावयकार, रमाकांत नायक गांवकार हांणी ह्या वेळार आपले विचार मांडले.
मानेस्तांक चंदा देसाय, मनुजा नायक गांवकार, वृंदा वेळीप, अंजली गांवकार, कायतानी फर्नांडीस, पूनम गांवकार, शैला नायक, तन्वी कोमरपंत, हांणी फुलांचे रोंपे भेटयले. ह्या वेळार सर्वानंद भगत, दामोदर नायक, आनंदु देसाय हांणी मनोगत उक्तायलें.
ह्या वेळार जांचीं घरां बांदपाचीं आसात त्या घरांची परिस्थिती दाखोवपी व्हिडिओ दाखयलो. हातूंत बॉरमिता फर्नांडीस, हरिश्चंद्र नायक, सुजाता पागी, प्रिया देसाय, नागी वरक, कुशवती भगत, निर्मला पागी, तनुजा पागी, आनंदु पागी, शामल पागी हांचो आसपाव आसा.
ह्या वेळार तवडकार हांणी मिरज हांगा अंबाबाई तालीम हे शरिरीक शिक्षण संस्थेंत शिकपी थंयचे शिक्षक अशोक काळे, श्रीकांत ओगाडी, बॅचमेंट संजय हिरकरे हांणी तीन घराक अर्थीक मजत करपा वांगडा दोन घरांचो खर्च उखलपाची तयारी दाखयली.
ह्या वेळार मंडपात दवरिल्ले दान पेटयेंत हाजीर आशिल्ल्या नागरिकांनी मजत दान केली. कार्यावळीचें सुत्रसंचलन संजय तवडकार हांणी केलें. येवकार भाजपा मंडळ अध्यक्ष विशाल देसाय हांणी दिलो जाल्यार सरचिटणीस दिवाकर पागी हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
