दरेका गांवांत जातली शेतकरी क्रेडीट सोसायटी

भांगरभूंय | प्रतिनिधी

केंद्र सरकाराचो उपक्रम : विवीध खात्यांच्या अधिकाऱ्यांची समिती स्थापन

भांगरभूंय । प्रतिनिधी

पणजी : सहकार वाठारांचो विस्तार तशेंच उदरगत करपा खातीर केंद्र सरकारान तरेकवार नवे उपक्रम सुरू करपाचो निर्णय घेतला. हेच धरतेर गोंयांत लेगीत मुळाव्या शेतकरी क्रॅडीट सोसायटींचो (पीएसीएस) आंकडो वाडोवपा सयत तांकां वेवसायीक मळार नवे उपक्रम सुरू करपाक मेळटले. 2029 मेरेन गोंयच्या दरेका गांवांत शेतकरी क्रेडीट सोसायटी जातली. तशेंच जनऔशधी केंद्र, गॅस एजन्सी, पॅत्रॉल/ डिझॅल विक्री अशें वेवसाय करपाची संद तांकां मेळटली. हे मोख पुराय करपा खातीर सहकार खात्यान तरेकवार खात्यांच्या अधिकाऱ्यांची समिती स्थापन केल्या.

हे समितीची अधिसुचोवणी जारी जाल्या. गोंयच्या सगल्या पंचायत वाठारांनी उण्यांत उणी एक तरी शेतकरी सोसायटी वा क्रॅडीट सोसायटी आसपाक जाय. तांचो वेव्हार वाडपाक जाय, अशें केंद्रीय सहकार मंत्रालयाचें धोरण आसा. ह्या धोरणाची कार्यवाही गोंयांत लेगीत सुरू जातली, अशें सहकार मंत्री सुभाष शिरोडकार हांणी सहकार सप्तका वेळार स्पश्ट केल्लें. हे प्रमाण समिती स्थापन करपा विशींची अधिसुचोवणी जारी जाल्या.

सहकार सचिवांच्या फुडारपणा खाला समन्वय समिती स्थापन जाल्या. गोरवां पोसपी खात्याचें सचीव, नुस्तेमारी खात्याचे सचीव, नागरी पुरवण खात्याचे सचीव, पंचायत सचीव, भलायकी सचीव, वीज सचीव, नाबार्डचे सरवेवस्थापक, पंचायत खात्याचे मुखेली, नागरी पुरवण खात्याचे मुखेली, सहकार भारती अध्यक्ष, गोवा बागायतदार सहकारी संस्थेचे अध्यक्ष, गोंय राज्य दूद उत्पादन संघाचे अध्यक्ष हे समितीचे वांगडी आसात.

2029 मेरेन नवे उपक्रम

० धान्याचो सांठो करपा खातीर गुदांव

० पीएम जनऔशधी केंद्र

० सेवा केंद्रां (सीएससी)

० पीएम किसान समृद्धी केंद्र

० पॅत्रॉल/ डिझॅल विक्री आवटलेट ० एलपीजी डीलरशीप