भांगरभूंय | प्रतिनिधी
मुख्यमंत्री : सांखळे भलायकी शिबिराक भेट
भांगरभूंय । प्रतिनिधी
दिवचल : दरेकल्यान आपली भलायकी तंदुरुस्त दवरची. भलायकी ही येसाची गुरुकिल्ली. भलायकी निरोगी आसली जाल्यारूच जिवीत समृद्ध जावपाक शकता. ते खातीर सगळ्यांनी भलायकेची जतनाय घेवची, अशें मुख्यमंत्री डॉ. प्रमोद सावंत हांणी सांगलें.
मुख्यमंत्री डॉ. सावंत हांणी आपल्या वाडदिसा निमतान विवीध देवळांक भेट दिवन आशिर्वाद घेतले, तशेंच गोंयकारांच्या पर्जळीत फुडारा खातीर, भलायके खातीर प्रार्थना केली. सांखळे भाजपा वतीन रवीन्द्र भवनांत आयोजीत केल्ल्या भव्य भलायकी शिबिराक तांणी भेट दिली आनी थंय आयिल्ल्या लोकांची वासपूस केली. ह्या वेळार ते उलयताले. ह्या भलायकी शिबिराक व्हड प्रतिसाद मेल्ळो.
वाडदीस मनयनासतना मुख्यमंत्र्यांनी फुलांतुरे, केक हांकां न्हयकार दिलो आनी तांच्यो शुभेत्सा स्विकारल्यो. पहलगान वाठारांत आतंकवादी हल्ल्यांत मरण आयिल्ल्यां खातीर दुखोवटो आशिल्ल्यान वाडदीस जाहीर तरेन मनोवचो ना, अशें मुख्यमंत्र्यांनी बुधवारा जाहीर केल्लें. तरी लेगीत तांच्या चाहत्यांनी सांखळे मुख्यमंत्र्यांच्या घरा कडेन गर्दी केल्ली. तांणी फुलांतुरे, केक हाडिल्ले. मात मुख्यमंत्र्यांनी ताका न्हयकार दिवन हात दिलो आनी शुभेत्सा स्विकारल्यो. मुख्यमंत्री डॉ. सावंत हांणी सांखळेच्या दत्तात्रय देवूळ, हरवळें आनी हेर देवळांनी वचून प्रार्थना केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
