भांगरभूंय | प्रतिनिधी
आमदार जीत आरोलकार: तुयेंच्या सरकारी विद्यालयांत झाडां वाटलीं
पेडणें : दरेकल्यान वन महोत्सवा निमतान पावस सुरू जाल्या उपरांत एक तरी झाड लावन सैमाचो तोल राखपाचो यत्न करचो. फकत झाडां लायलीं म्हणून जावचें ना. ताची बरे तरेन जतनाय घेवची. दरवर्सा तें झाड कशे तरेन वाडटा हाचे कडेन लक्ष दिवचें. दरेके शाळेंत, विद्यार्थ्यांक झाड दिल्यार ते घरा वचून रोवचें. ताका लागून अंदूं व्हडा प्रमाणांत सरकार आनी वन खात्या वरवीं मांद्रें मतदारसंघांतल्या शाळांनी झाडां वाटिल्ल्याचें मांद्रेंचे आमदार जीत आरोलकार हांणी सांगलें. तुयेंच्या सरकारी मुळाव्या आनी माध्यमीक विद्यालयांत वन महोत्सवाच्या निमतान झाडां वाटल्या उपरांत ते मुखेल सोयरे ह्या नात्यान उलयताले.
ह्या वेळार मुख्याध्यापिका शिरोडकार, शिक्षक सावंत, पालक आनी शिक्षक हाजीर आशिल्ले.
आमदार जीत आरोलकार हांणी, तुयें मुरमुरसे हांगचे इमारतीचें बांदकाम करतना कांय आडखळी निर्माण जाल्यात. ह्यो आडखळी सोडोवपा खातीर यत्न चालू आसात. ताका लागून आमी पुराय शाळेचे इमारतीची पळोवणी केली. हे इमारतीचें जें दुरुस्ती काम आसतलें ते विशीं आमी मुख्यमंत्री डॉक्टर प्रमोद सावंत हांचे कडेन चर्चा करून हें काम रोखडेंच हातांत घेतले अशें आमदार जीत आरोलकार हांणी म्हणलें.
दर वर्सा सरकार आनी रान खातें विंगड विंगड पंचायत, हायस्कुलांनी, नागरिकांक आनी समाजीक पर्यावरण संघटणांक व्हड प्रमाणांत झाडां वाट्टा. अंदूं पयलेच खेपे मांद्रें मतदारसंघाचे आमदार जीत आरोलकार हांणी विद्यार्थ्यांक व्हड प्रमाणांत विवीध तरेचीं झाडां वांटपाचो उपक्रम राबयला. दरेक झाड जगपाक जाय आनी ताची जतनाय विद्यार्थी आनी विद्यार्थ्यांचे पालक घेतले असो विस्वास उक्तावन पर्यावरणाचो तोल राखपा खातीर आनी चडांत चड लावपाक जाय आनी तीं तिगपाक जाय हे खातीर शाळांनी झाडां वाटिल्ल्याचें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
