भांगरभूंय | प्रतिनिधी
मुख्यमंत्री: भोंवपी भलायकी व्हेनीचें लोकार्पण
दिवचल: राज्यांतले विशिश्ठ जिवन पद्धतीक लागून तशेंच खाणा जेवणा कडेन आडनदर केल्ल्यान तीस पिरायेच्या तरणाट्यां मदीं काळजाच्या, गोडें मुताच्या दुयेंसांचो आंकडो वाडपाक लागला. आपले भलायकेची जतनाय घेतना दरेकल्यान आपले जिणे शैलींत गरजेचे बदल घडोवपाची गरज आसा. तशेंच खाणा जेवणाचेर नियंत्रण दवरून, व्यायाम करून आपली भलायकी बरी दवरात. सरकाराच्यो भलायके संबंदी बर्योच येवजण्यो आसात. तशेंच आयुर्वेदीक, होमियोपथी, अॅलोपथी तशेंच गांवांगांवांनी भलायकी सेवा दिवपा कडेन सरकार लक्ष दिता. दुयेंसां जावचींच ना हाची जतनाय घेवचो असो उलो मुख्यमंत्री डॉ. प्रमोद सावंत हांणी दिलो.
दिनदयाळ जनसेवा प्रतिश्ठाना वतीन मोबायल भलायकी सेवा तशेंच स्कूल व्हेनीच्या लोकार्पण सुवाळ्याक मुख्यमंत्री उलयताले. ही मोबायल भलायकी युनीट सेवा व्हॅन ब्लॅक अॅण्ड व्हिंटेज कंपनीन समाजीक सेवा उपक्रमा खाला पुरस्कृत केली. जाल्यार केनरा बँक गोंय वतीन स्कूल व्हॅन पुरस्कृत केली.
हे कार्यावळीक भाजप प्रदेश अध्यक्ष सदानंद तानवडे, आमदार डॉ. चंद्रकांत शेट्ये, आमदार प्रेमेंद्र शेट, नगराध्यक्ष कुंदन फळारी, कंपनी अधिकारी ब्रम्हेन्द्र ठाकूर, रामा नायक, अंताजी दुभाषी, विजयकुमार नाटेकार, आर गणेश, वल्लभ साळकार, कांता पाटणेंकार, सुभाष पाटणेंकार आनी हेर हाजीर आशिल्ले.
आयज डायलिसीस युनीट वाडतूच आसा. गोडेंमुताचो आंकडो वाडटा. ज्येश्ठ तशेंच बायलांनी भलायके विशीं जतनाय घेवची. तांचे खातीर ही भलायकी सेवा गरजेची थारतली अशें मुख्यमंत्री डॉ. सावंत हांणी फुडें म्हणलें.
केनरा बँक आनी कंपनीच्या सेवा उपक्रमांक तांणी परबीं भेटयलीं. सदानंद तानवडे हांणी दिनदयाळ हांचे सेवेचो आदर्श दवरून संस्था असले उपक्रम हातांत घेवन जनते खातीर जायत्यो सुविधायो उपलब्ध करता, अशें स्पश्ट केलें.
डॉ. चंद्रकांत शेट्ये हांणी भलायकी मळार तशेंच सेवा कार्यांत दिनदयाळ संस्थेन दिल्लें योगदान म्हत्वाचें आशिल्ल्यान गांवगिर्या वाठारांत मोबायल भलायकी सेवेक लागून जागृताय जातली अशें सांगलें.
प्रेमेंद्र शेट हांणी मोबायल भलायकी सेवेचो गांवगिर्या वाठारांत बरो उपेग जवन भलायके विशीं जागृताय वाडटली अशें स्पश्ट केलें.
ह्या वेळार भ्रमेंद्र ठाकूर, रामा नायक हांणी उपक्रमाची म्हायती दिली. सुत्रसंचालन सिद्धी पोरोब हांणी केलें. येवकार कांता पाटणेंकार हांणी दिलो.
ह्या वेळार मोबायल भलायकी सेवायुनीट उबारपी जयंत दिक्षीत तशेंच हेर मानेस्तांचो मुख्यमंत्र्या हस्तुकीं भोवमान जालो. विवीध मळांवेले मानेस्त ह्या वेळार हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
