भांगरभूंय | प्रतिनिधी
डॉ. प्रमोद सावंतः नवें धोरण 8 दिसांत लायतले चालीक
भांगरभूंय | प्रतिनिधी
पर्वरीः लोकांक सुरळीत वीज मेळची आनी बिलांचो भार उणो जावचो हे खातीर सरकारान नवें धोरण तयार केलां. फुडल्या 8 दिसांत हें धोरण चालीक लायतले. दरेकल्यान आपल्या घरांचेर सौर उर्जेचे पॅनल लायल्यार तुमचे विजेचे सगले प्रस्न सुटावे जातले, अशें वीज मंत्री सुदीन ढवळीकार हांणी आयज सभाघरांत स्पश्ट केलें. मजगतीं, सौर वीज प्रकल्प लावपाक सरकार 60 टक्के अनुदान दिता. ताचो फायदो घेवन सगल्यांनी आपल्या घरांचेर पॅनल लावचें असो उलो मुख्यमंत्री डॉ. प्रमोद सावंत हांणी मारलो.
आमदार विजय सरदेसाय हांणी वीज दरा विशींचो प्रस्न सभाघरांत मांडलो. ताचेर मंत्री ढवळीकार आनी मुख्यमंत्री डॉ. सावंत हांणी जाप दितना वयली म्हायती दिली.
बदलत्या काळा प्रमाण सरकार सौर उर्जेचे भर दिता. तशेंच सरकारानूय आपल्या कार्यालयां आनी इमारतींचेर सौर उर्जा लावपाक सुरवात केल्या. हें काम दोन वर्सांनी पुराय जातलें. ह्या पॅनलाची स्थापणूक आनी ताची देखरेख आनी दुरुस्ती खाजगी कंत्राटदारा वरवीं जातली अशी म्हायती मुख्यमंत्र्यान दिल्या. मजगतीं, आमदार कार्लुस फेरेरा हांणी सरकारी खात्यांनी व्हड प्रमाणांत वीज बिलां थकीत आशिल्ल्याचो विशय सभाघरांत मांडलो. हे विशीं वित्त खात्याक फायल धाडल्या आनी तिची वसुली करपाची प्रक्रिया सुरू आसा, अशें मंत्री ढवळीकार हांणी ह्या वेळार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
