भांगरभूंय | प्रतिनिधी
मडगांव, प्रतिनिधी : प्रादेशीक भाशेचेर आडकून पडचे परस, इंग्लीशींतल्यान शिक्षण घेवचे परस विंगड विंगड भासो जाणून घेतल्यार हाचो फायदो चड जातलो. शिक्षणीक मळारूय प्रादेशीक भाशे सयत हिंदी भाशेक उर्बा दिता. दरेकल्याक कोंकणी सयत हिंदी भास येवपाक जाय. राज्यांत ह्यान पयलीं इंग्लीशींतल्यान येवपी सरकारी आदेश आतां हिंदी भाशेंतल्यानूय येतात. ही सरकाराची उदरगत. संवादांतल्यो आडखळी पयस करीत जायत्या राज्यांनी दोट्टी भाशेंतल्यान अनुवाद करतात, अशें मत मुख्यमंत्री डॉ. प्रमोद सावंत हांणी मांडलें.
मडगांव रवींद्र भवनाच्या सभाघरांत गोमंतक राष्ट्रभास विद्यापीठाचो भांगराळो महोत्सव मनयलो. ह्या वेळार आमदार दिगंबर कामत, गोमंतक राष्ट्रभाशा विद्यापीठ अध्यक्ष कृष्णी वाळके, कोंकण रेल्वेचे अध्यक्ष संतोषकुमार झा, केंद्रीय हिंदी समितीचे सुनील कुलकर्णी, आदले खासदार नरेंद्र सावयकार आनी हेर मानेस्त हाजीर आशिल्ले. शशिकला काकोडकार आनी वांगड्यांनी ह्या विद्यापिठाची सुरुवात केल्ली.
गोंयच्या स्वातंत्र्याक १४ वर्सां कळाव जालो, तेन्नाय गोंयची भास कोंकणी आशिल्ली. गोंयचे लोक मराठी भास वाचताले. मात त्या वेळार हिंदी भाशेचे जाणकार सामके उणेच आशिल्ले. महाराष्ट्र, कर्नाटक आनी केरळांतल्यानूय कांय लोक गोंयांत आयले आनी हांगाच स्थायीक जाले. ताका लागून कन्नडाचो प्रभावूय गोंयांत वाडिल्ल्याचें दिसून आयलें.
एक देश विवीध भासो, विवीध भेस आसून लेगीत हिंदी भाशेक राष्ट्रभास म्हणून घोशीत केली. देशांतले कांय प्रांत हिंदीक राष्ट्रभास मानपाक तयार नाशिल्ले. तेन्ना केंद्र सरकारान राष्ट्रभाशेच्या प्रचारा खातीर यत्न सुरू केले. आजूनय कांय राजकीय पक्ष हिंदी भाशेक जाय तो मान दितना दिसना. प्रादेशीक भाशेक उर्बा मेळप गरजेचें. वांगडा देशांत उलोवपी हिंदी भासूय वाचपाक, उलोवपाक आनी बरोवपाक येवप गरजेचें. काश्मीर ते कन्याकुमारी मेरेन एके भाशेक लागून देश एक जाल्लो दिसता. खंयच्याय प्रदेशांत गेल्यार नागरिकांक संवाद सादप सोपें जाता. गोंयांत कोंकणी, मराठी, इंग्लीशी सयत हिंदी भासूय उलयतात, शिकयतात, अशेंय मुखार मुख्यमंत्र्यान म्हणलें.
विकसीत भारत २०४७ सयत विविधतायेंतल्यान एकवट कायम राखपाचें सपन प्रधानमंत्री मोदी हांणी दाखयलां. आमी विविध प्रांतांतले, विवीध संस्कृती, विविध भाशेचे जरी आसले तरी आमी भारतीय जावन आसात. हें आमकां सिद्ध करपाचें आसा, अशें मुख्यमंत्री डॉ. सावंत हांणी सांगलें.
मुख्यमंत्री आसतनाच राजभास मंत्री म्हणूनय कार्यरत आसां. ह्या नात्यान राज्यांत भाशा संशोधन विभागाची सुरुवात केल्या. राज्यभास संचालनालया वतीन कोंकणींतल्यान हिंदी आनी हिंदींतल्यान कोंकणी आनी हेर भासांनी अनुवाद करतात. म्हत्वाचीं कागदपत्रां संवर्धना खातीर ऑफिशिअल लँग्वेज रिसर्च सेल बंगलोर हांचे कडेन करार जाला. राज्याक अजूनय हिंदी भास जाणा आशिल्ल्या अनुवादकांची गरज लागतली. भाशा शिकपा वांगडा घेवचें, अशेंय मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
