भांगरभूंय | प्रतिनिधी
पेडणें: समाजकल्याण खात्या वतीन राबयिल्ल्या दयानंद सामाजीक सुरक्षा येवजणेचे जायते लावार्थी फाटलें वर्सभर जालें फकत अर्ध्या मानधनाचेर समाधान मानतात. येवजणे खाला लावार्थ्यांक दर म्हयन्याक २,००० रुपया मेळप अपेक्षीत आसता. मात सध्या फकत समाजकल्याण खात्याच्या वतीन ९७५ रुपया तांच्या बँक खात्यांनी एकठांय करतात. एलआयसी दिवपी उरिल्ले १,०२५ रुपया मे २०२४ सावन येवपाचे बंद जाल्यात.
हे विशीं लावार्थ्यांनी समाजकल्याण खात्या कडेन संपर्क करपाचो यत्न केलो, तेन्ना समाधानी जाप मेळूंक नाशिल्ल्याच्यो कागाळी आसात. खात्याच्या हेल्पलायन कार्यावळींचेर संपर्क केल्यार, सध्या सर्वेक्षण सुरू आसा, हाका लागून अर्दे पयशे मेळपाक कळाव जाता, अशी जाप अधिकारी दितात. मात अर्दें मानधन दिवपा खातीर सरकाराक कसली आडखळ निर्माण जाता, असो प्रस्न हातुंतल्यान हजर जाता.
मुख्यमंत्र्यांनी जाहीर केल्ली कागाळ
निवारण क्रमांकाचेर कागाळ केली तेन्ना, ताचे वेल्यानूय खास प्रतिसाद मेळना अशें दिसून येता. मुख्यमंत्री कार्यालया वरवीं समाजकल्याण खात्याकडेन कागाळ धाडटात आनी ताचे वेल्यान लावार्थ्यांचें मानधन बँक खात्यांत जमा केला, अशी जाप दिता. मात प्रत्यक्षांत लावार्थ्यांच्या खात्यांत संबंदीत रक्कम जमा जावंक ना.
६० वर्सांवेल्या ज्येश्ठ नागरिकांक अर्थीक मजत दिवपाच्या हेतान सरकारान ही येवजण सुरू केल्ली. तशेंच, प्रत्यक्षांत लावार्थ्यांक हे येवजणेचो पुराय लाव मेळनाशिल्ल्याचें चित्र सध्या दिसून येता. सुत्रां कडल्यान मेळिल्ले म्हायती प्रमाण, पुराय गोंयच्या ३,५०० परस चड लावार्थ्यांक फाटल्या वर्सभरा सावन दर म्हयन्याक फकत ९७५ रुपयाच मेळटात, जाल्यार उरिल्ले १,०२५ रुपया प्रलंबीत आसात.
हे विशीं समाजकल्याण खात्याचे संचालक हांचे कडेन संपर्क करपाचो यत्न केलो तेन्ना तांचे कडल्यानूय कसलेच तरेचो प्रतिसाद मेळूंक ना, अशी म्हायती लावार्थ्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
