भांगरभूंय | प्रतिनिधी
मडगांव : धर्मीक भावना दुखयिल्ल्या प्रकरणांत काणकोण पुलिसांनी उद्देजक, साहित्यकार दत्ता नायक हांचेर गुन्यांव नोंद केला. दत्ता हांणी मडगांव न्यायालयांत अटकपुर्व जामिना खातीर अर्ज दाखल केल्लो. ताचेर सुनावणे वेळार न्यायालयान अंतरीम समाधान दिवपाक न्हयकार दिला. तांच्या जामीन अर्जाचेर फाल्यां १० जानेवारीक सुनावणी जातली.
‘धर्माच्या नांवा खाला मठ, देवळां भरपूर पयशे लुट्टात’अशें वक्तव्य उद्देजक दत्ता नायक हांणी एका चॅनलाक मुलाखत दितना म्हणिल्लें. उपरांत समाजीक शांतिकायेचो भंग करून धर्मीक भावना दुखावल्ल्या प्रकरणांत तांचे आड काणकोण पुलीस स्टेशनाचेर कागाळ नोंद जाल्ली. पणजी आनी मडगांव पुलीस स्टेशनांतूय नायक हांचे आड ह्याच प्रकरणा खातीर कागाळी नोंद जाल्ल्यो. उपरांत काणकोण पुलिसांनी धर्मीक भावना दुखावल्ले खातीर दत्ता नायक हांचे आड गुन्यांव नोंद केल्लो.
गुन्यांव नोंद जाले उपरांत मंगळारा नायक हांचे कडल्यान मडगांवच्या न्यायालयांत अटकपूर्व जामिना खातीर अर्ज दाखल केल्लो. बिरेस्तारा ह्या जामीन अर्जाचेर जाल्ले सुनावणे वेळार काणकोण पुलिसांनी जामिनाक विरोध दाखयत नायक हांच्या वक्तव्याक लागून राज्यांतलो कायदो आनी सुवेवस्थेचो व्हडलो प्रस्न उप्रासपाची स्थिती निर्माण जाल्या. ताका लागून तांचे कडल्यान म्हायती आनी पुरावे एकठांय करपाक अटकेची गरज आशिल्ल्याचें मत मांडलें. हे सुनावणे वेळार मडगांव न्यायालया वतीन अंतरिम समाधान दिवपाक न्हयकार दिलो. नायक हांच्या जामीन अर्जाचेर १० जानेवारीक सुनावणी जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
