भांगरभूंय | प्रतिनिधी
मडगांव, प्रतिनिधी ः धर्मीक भावना दुखयिल्ल्या प्रकरणांत काणकोण पुलिसांनी उद्देजक, साहित्यकार दत्ता नायक हांचेर गुन्यांव नोंद केला. तांणी मडगांव न्यायालयांत अटकपुर्व जामिना खातीर अर्ज दाखल केल्लो. ताचेर सोमारा सुनावणी जाली आनी अटी. शर्तीचेर अटकपूर्व जामीन मंजूर केलो.
‘धर्माच्या नांवा खाला मठ, देवळां भरपूर पयशे लुट्टात’अशें वक्तव्य उद्देजक दत्ता नायक हांणी एका चॅनलाक मुलाखत दितना केल्लें, असो आरोप आसा. उपरांत समाजीक शांतिकायेचो भंग करून धर्मीक भावना दुखावल्ल्या प्रकरणांत तांचे आड काणकोण पुलीस स्टेशनाचेर कागाळ नोंद जाल्ली. उपरांत ह्याच प्रकरणांत पणजी आनी मडगांव पुलीस स्टेशनांतूय नायक हांचे आड कागाळी नोंद जाल्ल्यो. ताचेर आदारून काणकोण पुलिसांनी धर्मीक भावना दुखाविल्ले खातीर दत्ता नायक हांचे आड गुन्यांव नोंद केल्लो. उपरांत मंगळारा नायक हांणी मडगांवच्या न्यायालयांत अटकपूर्व जामिना खातीर अर्ज दाखल केल्लो. ताचेर जाल्ले सुनावणे वेळार काणकोण पुलिसांनी जामिनाक विरोध केलो, आनी न्यायालया कडल्यान अंतरीम सुटका दिवपाक न्हयकार दिलो. सोमारा जामीन अर्जाचे सुनावणे वेळार न्यायालयान नायक हांकां 25 हजार रुपयाच्या वैयक्तीक बॉण्डाची अट घालून सशर्त अटकपूर्व जामीन मंजूर केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
