भांगरभूंय | प्रतिनिधी
मडगांव: धर्मीक भावना दुखयिल्ल्या प्रकरणांत काणकोण पुलिसांनी उद्देजक दत्ता दामोदर नायक हांचेर गुन्यांव नोंद केला. उपरांत दत्ता नायक हांणी मडगांवच्या न्यायालयांत अटकपूर्व जामिना खातीर अर्ज दाखल केला. आयज (बिरेस्तार) सकाळीं 10 वरांचेर ह्या अर्जाचेर सुनावणी जातली.
धर्माच्या नांवा खाला मठ, देवळां व्हड प्रमाणांत पयशे लुट्टात अशें उलोवप उद्देजक दत्ता नायक हांणी एका खबरां चॅनलाक मुलाखत दितना म्हणिल्लें. उपरांत समाजीक शांततायेचो भंग करीत धर्मीक भावना दुखयिल्ल्या प्रकरणांत दत्ता नायक हांचे आड काणकोण पुलीस स्टेशनार कागाळ नोंद जाल्ली. पणजी आनी मडगांव पुलीस स्टेशनारूय दत्ता नायक हांचे आड ह्याच प्रकरणांत कागाळी दाखल जाल्ल्यो.
काणकोण पुलिसांनी धर्मीक भावना दुखयिल्ल्या प्रकरणांत दत्ता नायक हांचे आड गुन्यांव नोंद केल्लो. गुन्यांव नोंद जाले उपरांत मंगळारा दत्ता नायक हांचे कडल्यान मडगांवच्या न्यायालयांत अटकपूर्व जामिना खातीर अर्ज दाखल केला. 7 जानेवारी दिसा ताचेर सुनावणी आनी फुडली सुनावणी आयज बिरेस्तारा सकाळीं 10 वरांचेर जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
