भांगरभूंय | प्रतिनिधी
उडुपी, खबरां संस्था ः कर्नाटक राज्यांतल्या उडुपी जिल्ह्यांतल्यान एक धक्को दिवपी खबर आयल्या. कौप तालुक्यांतल्या एका कलाकार जोडप्यान डिप्रेशनाक लागून आत्महत्या केल्या. 16 वर्सां आदीं ह्या जोडप्यान एक चली दत्तक घेतिल्ली. तेच चली कांय दिसा सावन बेपत्ता आसा. तांकां हें दुख्ख सोंसूंक जालें ना. हाका लागून कांय दीस ते उदास आशिल्ले. देखून तांणी आत्महत्या केल्या आसूं येता. पूण पुलिसांनी हे संबंदी अजून कसलीच गजाल उक्ती करूंक ना. घडणुकेच्या थळार चिट मेळ्ळ्या, पूण तातूंतल्या मजकुराची पुलिसांनी चड म्हायती दिवंक ना.
नामनेचे नाट्य अभिनेते लीलाधर शेट्टी (68) आनी तांची घरकान्न वसुंधरा एल शेट्टी (59) हांची कुड मंगळारा उडिपींतल्या तांच्या घरांत मेळ्ळीं. दोगांयनी गोळ घेवन आत्महत्या केल्याचे स्पश्ट जालें.
बेपत्ता चलयेचो सोद
शेट्टी कुटुंबान दाखल केल्ले कागाळी उपरांत अपहरणाचो गुन्यांव नोंद करुन बेपत्ता जाल्ले चलयेचो सोद पुलिसांनी सुरू केला. लीलाधर शेट्टीन एक फावट कौप विधानसभा मतदारसंघांतल्यान वेंचणूक लढयल्ली. ग्रामपंचायतींतय ताणें काम केलां. तांचे नाट्य मंडळ उडुपींत लोकप्रीय आसा आनी त्या वाठारांत ह्या जोडप्याक खूब मान आशिल्लो.
रंगतरंग ही नाट्य संस्था लीलाधर हांणी रंगमाचयेच्या मोगान स्थापन केल्ली. तिचे वरवीं तांणी जायतीं नाटकां सादर केल्लीं. समाजीक कार्यावळींनीय हें जोडपें वांटो घेतालें. हे खातीर तांचो जायते फावटीं वेगवेगळ्या पुरस्कारांनी भोवमान केल्लो. पूण तांणी अचकीत संवसाराक निरोप दिवपाचें थारायलें आनी आत्महत्या केल्ल्यान कौप तालुक्यांतल्या लोकांनी दुख्ख उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
