दक्षीण सुदानांत चार्टर्ड विमान कोसळ्ळें: २० जाणांक मरण, एका भारतीयाचो आसपाव

भांगरभूंय | प्रतिनिधी

जुबा, खबरां संस्था: दक्षीण सुदानच्या युनिटी राज्यांत बुधवारा विमान कोसळून २० जाणांक मरण आयलें. सीएनएनच्या रिपोर्टा प्रमाण, हें एक ल्हान विमान आशिल्लें. जातूंत दोन पायलटां सयत २१ लोक आशिल्ले. तें चीनी तेल कंपनी ग्रेटर पायोनियर ऑपरेटिंग कंपनीन भाड्यान घेतिल्लें.
युनिटीचे म्हायती मंत्री गटवेच बिपल हांणी सांगलें, थळावे वेळे प्रमाण सकाळीं १०.३० वरांचेर हो अपघात जालो. मरण आयिल्ल्यां मदीं दोग चिनी आनी एक भारतीय नागरिकाचो आसपाव आसा. हें विमान दक्षीणी सुदानांतल्या तेल क्षेत्रांतल्यान उड्डाण करतालें. विमानांत तेल कंपनी कडेन संबंदीत कर्मचारी आशिल्ले. ही घडणूक नेमकी कित्याक लागून घडली हें स्पश्ट जावंक ना. सध्या चवकशी चालू आसा.
दक्षीण सुदानाक २०११ वर्सा सुदाना पसून स्वातंत्र्य मेळ्ळें. तेन्ना सावन जायते विमान अपघात जाल्यात. सप्टेंबर २०१८ वर्सा राजधानी जुबाच्यान रिओलला वचपी चार्टर्ड विमान कोसळिल्लें. हातूंत १९ जाणांक मरण आयिल्लें. २०१५ त, रशियन बनावटीचें एक माल व्हरपी विमान राजधानी जुबाच्यान उड्डाण घेतना पडिल्लें. ३६ जाणांक मरण आयिल्लें.