भांगरभूंय | प्रतिनिधी
भांगरभूंय । प्रतिनिधी
वास्कोः गोंय क्रिकेट असोसिएशनान आयोजीत केल्ल्या दक्षीण विभागीय आंतरराज्य अंडर-14 क्रिकेट सर्तींत कर्नाटक पंगड वस्ताद थारलो. कर्नाटक आनी तमिळनाडू मदली फायनल मॅच डॅॉ जाली. मात पडल्या डावांतल्या चड धांवड्यो केल्ल्यान कर्नाटकाक जैतिवंत घोशीत केलें.
तामिळनाडून तांच्या पयल्या डावांत 90 ओव्हरींत 9 आवट 363 धांवड्यो केल्ल्यो जाल्यार कर्नाटकान 88 ओव्हरींत 8 आवट 366 धांवड्यो केल्ल्यो. चिखली हांगा गोंय खेळां प्राधिकरणाच्या मैदानार जाल्ले फायनलींत तमिळनाडूच्या आर टी जिश्नू हाणे 149 बॉलांत 120 धांवड्यो केल्यो. कर्नाटकाच्या सुकृत एस हाणे 135 बॉलांत 117 धांवड्यो केल्यो. कर्नाटकाच्या ओंम अगरवालान 2 जाल्यार तमिळनाडूच्या ए ए नितीन हाणे 56 धांवड्यांत 3 विकेटी घेतल्यो. मॅन ऑफ दी मॅच म्हणून कर्नाटकाच्या सुकृत एस हाका पुरस्कार फावो जालो. हे सर्तींत पुडुचेरी, हैदरबाद, कर्नाटक, आंध्रप्रदेश, केरळ, गोंय आनी तमिळनाडूच्या पंगडांनी वाटो घेतिल्लो.
इनाम वितरण कार्यावळीक मुखेल सोयरो म्हणून वास्कोचो आमदार कृष्णा साळकार हाजीर आशिल्लो. गोंय क्रिकेट असोसिएशनाचो सचीव रोहन गांवस देसाय, जोड सचीव रुपेश नायक, मुरगांवचो नगराध्यक्ष गिरीश बोरकार, चिखलीचो सरपंच कमलाप्रसाद यादव आदलो सभापती राजेश पाटणेकार हाजीर आशिल्ले. रोहन देसायान ही सर्त आयोजीत करपा फाटलो हेत सांगलो. रुपेश नायक हाणे ही सर्त येसस्वी करपाक परिश्रम घेतले अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
