भांगरभूंय | प्रतिनिधी
भारताच्या उपराष्ट्रपतीपदा खातीर महाराष्ट्राचे सद्याचे राज्यपाल सी. पी. राधाकृष्णन हांकां आपलो उमेदवार म्हूण जाहीर करून सत्ताधारी भारतीय जनता पक्षान एकाच तिरान खूबशा जाणांची कास केल्ली दिसता. येता त्या 9 सप्टेंबर दिसा देशाक नवे उपराष्ट्रपती मेळटले, आनी सी. पी. राधाकृष्णन हांच्या उमेदवारी विशीं उलोवपाचें आसत जाल्यार मुखेल पक्ष आशिल्ल्या काँग्रेस आनी हेर खूबशा पक्षांक तांचे आड उमेदवार सोदपाची गरज भासतली अशें दिसून येना. हरशीं काँग्रेस, राष्ट्रीय जनता दल, समाजवादी अशे मुखेल पक्ष वेंचणूक आयोगा सारक्या संविधानीक संस्थेचीं मुळां हुमटावपाच्या कामांत इतले व्यस्त आसात की तातूंतल्यान एक दोन दिसांचो वेळ काडून आपलो एखादो उमेदवार वेंचपा खातीर चर्चा करून निर्णय घेवप तांच्या हिसपा भायलें काम दिसता. विरोधी पक्षाचे फुडारी राहुल गांधी हेर तर ‘रखवालदार चोर है’ ह्या तांच्या पोरण्याच तालार ‘वेंचणूक आयोग मतचोर है’ हे तांचे नवें गीत गावपाक इतले व्यस्त आसात की आनीक कसलेंच भान तांकां आशिल्ल्याचें दिसून येना. तांच्याच सुरांत सूर मेळोवन तेजस्वी यादव, अखिलेश यादव बी इतलें बेभान जावन नाचत आसात की बिहारांत सत्तापालट जणू तांकां प्रत्यक्ष दिसूंक लागलां. अशे परिस्थितींत भाजप सांसदीय मंडळान दीर्घ चर्चे उपरांत आपलो उपराष्ट्रपतीपदाचो उमेदवार जाहीर केलो तरी विरोधी पक्ष वा ‘इंडी’ आघाडीन त्या आघाडीचेर सादें पावल लेगीत घाल्ल्याचें दिसून येना.
उपराष्ट्रपती जगदीप धनकड हांणी भलायकीच्या कारणा वेल्यान संसदेचें अधिवेशन चालू आसतना तडकाफडकी दिल्ल्या राजिनाम्या उपरांत नवे उपराष्ट्रपती वेंचून काडपाची प्रक्रिया नेमां प्रमाण रोखडीच सुरू लेगीत जाली, पूण आपलो उमेदवार कोण आसचो हे विशीं विरोधकांनी एकठांय येवन केन्ना चर्चा केल्ल्याचें चित्र केन्नाच दिसलें ना. उरफाटें सत्ताधारी आघाडीच्या उमेदवाराचें नांव जाहीर जाय मेरेन रावप हेंच बरें अशें तांकां दिसलां आसुये. आतां उमेदवारी अर्ज दाखल करपा खातीर फक्त दोन अडेज दीस उरिल्ले आसतना तांची धांवपळ, धडपड सुरू जाल्ली आसली तरी भारतीय जनता पक्षान जो उमेदवार जाहीर केला तो पळयत जाल्यार विरोधी पक्ष आतां हेर एखाद्या उमेदवाराक उपराष्ट्रपतीचे वेंचणुकेंत देंवोवपा खातीर एकठांय येवपाची शक्यताय लेगीत धुसर जाल्या. भाजप वा पर्यायान राष्ट्रीय लोकशाय आघाडीच्या मास्टर स्ट्रोकाक लागून विरोधकांची एकठांय येवपाची आशिल्ली नाशिल्ली शक्यताय लेगीत सोंपत आयल्या. सी. पी. राधाकृष्णन हांचें नांव उपराष्ट्रपतीपदाच्या उमेदवारी खातीर निश्चीत करतना भारतीय जनता पक्षाच्या केंद्रीय फुडाऱ्यांनी चड करून प्रधानमंत्री नरेंद्र मोदी आदींनी जी दूरदृश्टी दाखयल्या ती पळयत जाल्यार एका फातरांत तांणी खुबशीं सुकणीं मारपाक येस मेळयलां अशेंच म्हणचें पडटलें. भारतीय जनता पक्षान दक्षीणेंत आपलो आधार कसो वाडटलो हाचीच गणितां सदांच मांडल्यात आनी आतां सी. पी. राधाकृष्णन हांचे सारक्या व्यक्तीची उपराष्ट्रपतीपदा खातीर निवड करून दक्षीण भारत जोडपाक ते तयार जाल्यात होच निश्कर्श हातूंतल्यान काडूं येता.
विरोधकांक पुरायपणान घेरपा खातीर रणनिती आंखपाक भाजपाचो आयज कोणूच हात धरूंक शकना. काँग्रेस वा हेर पक्षांत अशा व्यक्तींचो उणाव आसा की भाजपाक रणनितींत शेराक सवायशेर जावंक शकतलो. राहुल गांधीचे अपरिपक्व फुडारपण तर काँग्रेसीच्या मुळारूच घावो घालत आसा अशें पक्षा भायल्याच न्हय जाल्यार पक्षांतल्याच खूबशा जाणांक दिसता आनी हातूंत कसलीच चूक ना. सी. पी. राधाकृष्णन हांचे सारक्या, कसल्याच वादा पसून पयस राविल्ल्या आनी खूबशीं वर्सां राजकी मळार वावुरपी तामीळनाडूंतल्या मागासवर्गीय फुडाऱ्याची उमेदवार म्हूण निवड करतना भाजपान फुडल्या वर्सा त्या राज्यांत जावपी विधानसभा वेंचणुकांचो विचार केलो ना अशें म्हणप धाडसाचें थारतलें. विरोधकांक लेगीत हो आपलोच चेरो दिसचो अशेंच हें व्यक्तीमत्व आनी ताचोच सगलो विचार करूनच भाजपान तांची निवड करून हो मास्टर स्ट्रोक खेळिल्लो आसुये. लोकसभेंत आनी राज्यसभेंत मेळून जांचे वट्ट 32 खासदार आसात त्या द्रमूक पक्षा खातीर सी. पी. राधाकृष्णन हांचे उमेदवारीक विरोध करप खूबशें कठीण वतलें आनी ताचो विचार भाजपान केल्लो नासत अशें म्हणूंक येवचें ना. भारतीय जनता पक्षाची ही 2026 खातीरची वेंचणूक रणनिती आसून विरोधकांक तांणी अक्षरशा कोंयडेंत धरल्यात. विरोधी ‘इंडी’ आघाडीतले खूबशे पक्ष अशे आसात की तांणी सी. पी. राधाकृष्णन हांचें नांव उपराष्ट्रपतीपदाचे उमेदवार म्हूण जाहीर जातकच त्या नांवाक विरोध जावचो न्हय अशीच कांय अशी भुमिका घेतल्या. ताका लागून तांच्या नांवार सहमती आसप खूबशें अपेक्षीत आसा.
‘इंडी’ आघाडीतल्या खूबशा पक्षांचे फुडारी भाजपान जाहीर केल्ल्या उमेदवारा विशीं सहमत आसात. महाराष्ट्रांतल्या उबाठाची शिवसेना लेगीत ह्या आघाडीतलो असो पक्ष आसा की राज्यपाल सी. पी. राधाकृष्णन हांचे उमेदवारीक तांचो विरोध आसपाची शक्यताय उणी आसा. उबाठा शिवसेनेच्या एक दोन फुडार्यांनी इंडीची बसका जावचे पयलींच तशें सुचीत केलां. अशे परिस्थितींत उपराष्ट्रपतीपदाचे वेंचणुकेंत भाजपा कडेन टक्कर दिवपाचीच ह्या निर्णया मेरेन काँग्रेस आनी हेर कांय पक्ष येत जाल्यार ‘इंडी’तल्या तथाकथीत एकवटाक अजून वेंर वचपाची भिरांत आसा आनी ती टाळपा खातीर मुखेलपणान यत्न जातले अशे संकेत मेळटात. तथाकथीत ‘मतचोरी’च्या प्रस्नाचेर खूबशे विरोधक एकठांय आयिल्ल्यान उपराष्ट्रपतीचे वेंचणुके वेल्यान मतभेद वयर सरप तांकां परवडचें ना. भाजपाची चाल धूर्त आसली तरी तांचे कडेन सहमती दाखोवन आमचो विरोध हो विरोधा खातीर विरोध ह्या स्वरुपाचो नासून तो विधायक आसा असो दावो करप लेगीत तांकां शक्य जातलें.
प्रादेशीक पक्षांकूय योग्य संदेश भाजपान आपल्या उमेदवार निवडीन दिला. दिल्लीतले सत्तेंत दक्षीण भारताची भागिदारी वाडत आशिल्ल्याचेंच तांकां दाखोवन दिवपाचें आसून ताचे अनुकूल परिणाम तांकां अपेक्षीत आसात. महाराष्ट्रांत राज्यपालपदार आसतना उपराष्ट्रपतीपदार विराजमान जावपी सी. पी. राधाकृष्णन, डॉ. शंकर दयाळ शर्मा हांचे उपरांतची दुसरी व्यक्ती जावंक शकतली. महाराष्ट्रांतल्यान तांकां पुराय तेंको ताका लागूनय अपेक्षीत आसा. विरोधकांचे सहमतीन तांची उपराष्ट्रपतीपदार बिनविरोध निवड जायत जाल्यार आयच्या धवळून गेल्ल्या राजकारणांत तो एक आशेचो किरण थारूंक शकतलो.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
