भांगरभूंय | प्रतिनिधी
टिकम सिंह हांचे कडेन ताबो
पणजीः दक्षीण गोंय पुलीस अधीक्षक सुनिता सावंत हांची बदली केल्या. आयपीएस अधिकारी टिकम सिंह हांचे कडेन अधीक्षकपदाचो ताबो दिला.
सूत्रांनी दिल्ले म्हायती प्रमाण, सोमारा रातच्या 11 वरांचेर सुनीता सावंत हांणी आपूण आपले कार्यालय सोडटा अशें पुलीस खात्याक कळयलें. ते उपरांत रोखडीच तांची बदली केली आनी त्या पदाचो ताबो आयपीएस अधिकारी टिकम सिंह हांचे कडेन दिलो अशें सूत्रांनी सांगलें.
दक्षीण गोंय अधीक्षक पद आयपीएस कॅडराचे आसा. पूण जायत्या वर्सां उपरांत ह्या पदाचेर गोंयच्या पुलीस अधिकाऱ्याची नेमणूक जाल्ली.
मजगतीं, दक्षीण गोंयच्या कांय आमदारां कडेन वेगवेगळ्या गजालींवेल्यान सुनीता सावंत हांचे बरें नाशिल्लें. हे संबंदी तांणी सावंत हांची मुख्यमंत्री डॉ. प्रमोद सावंत हांचे कडेन कागाळ केल्ली. हाका लागून सावंत हांची अचकीत बदली जाल्ल्याची चर्चा पुलीस खात्यांत सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
