भांगरभूंय | प्रतिनिधी
कार्यकाळांतली निमाणी बसका जाली: मेळिल्ल्या निधीचो शंभर टक्के वापर
मडगांव : दक्षीण गोंय जिल्लो पंचायतीची ह्या कार्यकाळांतली निमाणी बसका जाली. हाचे उपरांत अध्यक्ष अनिता थोरात हांणी सांगलें, दक्षीण गोंय जिल्लो जिल्लो पंचायतीच्या फाटल्या पांच वर्सांनीं मेळिल्ल्या निधीं मदलो शंभर टक्के निधी विकासकामांचेर खर्च केला. तशेंच जिल्लो भवना खातीर दवर्ली सुवात निश्चीत केल्या. ही फायल फुडले प्रक्रिये खातीर धाडिल्ल्याचें स्पश्ट केलें.
दक्षीण गोंय जिल्लो पंचायतीची बसका बुधवारा सकाळीं कार्यालयाच्या सभाघरांत जाली. जिल्लो पंचायतीच्यो जावपाच्यो आशिल्ल्यान ही ह्या कार्यकाळांतली निमाणी बसका आशिल्ली. हातूंत 15 व्या वित्त आयोगाचो कांय निधी मेळपाचो आशिल्ल्यान, वेंचणुकांची घोशणा जावचे पयलीं तो निधी मिळचो अशी मागणी केली. तशेंच दक्षीण गोंय जिल्लो पंचायतीक फाटल्या पांच वर्सांनी मेळिल्ल्या निधींतलो सगलो निधी खर्च केला. म्हजें घर येवजण आनी जीएसटी उणें केल्ले खातीर सरकाराक परबीं भेटयलीं. फाटलीं पांच वर्सां प्रशासकीय निधी खाला 33.50 कोटी मंजूर जाले आनी 10.17 कोटींचो खर्च केलो. ग्रामीण मुळावी सुविधा निधी खाला 59.25 कोटी मंजूर जाल्ल्यान 35.16 कोटींचो खर्च केलो. एसटी निधी खाला 7.76 कोटी मेळ्ळे, जाल्यार 3.88 कोटींचो खर्च केलो, एससी निधी खाला 2.19 कोटींचो निधी मेळ्ळो आनी 28.62 लाखांचो खर्च केलो.
केंद्र सरकारा कडल्यान विवीध येवजण्यां खाला मेळिल्ल्या 15.14 कोटीं मदल्या 2.56 कोटींचो खर्च केला. तशेंच हेर मंजूर आशिल्लो निधी बेगोबेग मेळोवपाक यत्न करतात, अशेंय थोरात हांणी सांगलें. पुराय जाल्ल्या फायलीं मदल्या 90 टक्के कामांची वर्क ऑर्डर काडल्या. जिल्लो पंचायत भवना खातीर दवर्लीच्या शिक्षण खात्याचे अखत्यारींतले 5 हजार चौखण मिटर जाग्याची निवड केल्या. ते सुवातेचीं कागदपत्रां ताब्यांत घेतिल्ल्यान जिल्लो पंचायत बसकेंत थाराव घेवन फुडले प्रक्रिये खातीर धाडलां. हे विशीं पंचायत मंत्री मॉविन गुदिन्हो हांचे कडेनूय चर्चा केल्या.
पंचायत खात्या कडल्यान फुडले मंजुरी खातीर ही फायल गेल्ल्यान बेगीनूच ताचेरूय निर्णय जातलो, अशें सांगलें. जिल्लो पंचायत वांगड्यांचे निधींत वाड केल्या. मात आजूनय गरजेचे अधिकार मेळूंक ना. ते विशीं सरकारा कडेन मागणी केल्ल्यान फुडाराक ताचेरूय निश्चीतूच निर्णय जातलो, अशें अनिता थोरात हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
