भांगरभूंय | प्रतिनिधी
सगल्यांक सोदपाक पुलिसांक येस
मडगांव: दक्षीण गोंय जिल्ह्यांतल्या विवीध पुलीस स्टेशनांनी फाटल्या ४५ दिसांच्या काळांत वट्ट १० नेण्टीं भुरगीं बेपत्ता आशिल्ल्याचीं प्रकरणां नोंद जाल्यांत. समाधान करपा सारकी गजाल म्हळ्यार, ह्या सगल्या भुरग्यांचो पुलिसांनी रोखडोच सोद घेवन तांकां तांच्या कुटुंबियांचे सुवादीन केलां.
दक्षीण गोंयांत फाटल्या देड म्हयन्यांत (४५ दिवसांत) १० भुरग्यांची बेपत्ता जावपाचीं प्रकरणां नोंद केलीं. कायद्याचे गरजे प्रमाण आनी भुरग्यांचे सुरक्षितताये विशीं संबंदीत गजालींक प्राधान्य दिवन, सगल्या प्रकरणांनी रोखडोच गुन्यांव नोंद केलो.
ऑक्टोबर म्हयन्यांत वास्को, वेर्णा आनी फोंड्यां दरेकी एक नेण्ट्या भुरग्यांचें प्रकरण नोंद जाल्लें. तशेंच, नोव्हेंबर म्हयन्यांत वट्ट सात प्रकरणां नोंद केल्यांत. हातूंत मडगांवां तीन, तर कोलवा, कुंकळळी, केपें, आनी वास्को दरेकी एका प्रकरणाचो आसपाव आसा. ह्या सगल्या प्रकरणांतल्या भुरग्यांचो सोद पुलिसांनी पुराय केला. पुलिसांच्या विशेश पंगडांच्या यत्नांक लागून आनी तात्रीक देखरेख आनी आधुनीक तंत्रज्ञानाचो वापर करीत, सगले बेपत्ता नेण्ट्या भुरग्यांक येसस्वी तरेन सोदले. उपरांत तांकां तांच्या कुटुंबीयांच्या सुवादीन केले. दक्षीण जिल्लो पुलीस दळाचे मुखेली सगले नागरिक, विशेश म्हळ्यार भुरगीं आनी बायलांचे सुरक्षितताये खातीर आनी राखपाक कार्यरत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
