भांगरभूंय | प्रतिनिधी
मडगांवः सनबर्न ह्या आशियांतल्या मुखेल इलॅक्ट्रॉनीक डान्स म्युझीक (ईडीएम) फेस्टिवला वतीन तांच्या 18 व्या पर्वाच्या वर्सुकी संगीत महोत्सवाची ‘सनबर्न गोंय 2024’ ची घोशणा केल्या. 28 ते 30 डिसेंबर हे तीन दीस दक्षीण गोंयांत हो महोत्सव घडोवन हाडटात. अंदूं हो महोत्सव दक्षीण गोंयांत जावपाची शक्यताय आसा. हाका पुराय दक्षीण गोंयांत विरोध जावपाक लागला.
उत्तर गोंयांत 15 वर्सां जालीं सनबर्न फेस्टिवल जाता. थंय कांय समस्या निर्माण जाल्ल्यान दक्षीण गोंयांत हाडपाचो यत्न सुरू आसा. सनबर्न फेस्टिवलाचो संबंद सदांच ड्रग्सां कडेन आसता. हो उत्सव बरो आसत जाल्यार तो प्रधानमंत्री मोदी हांच्या गुजरातांत स्थलांतरीत करचो. गोंयाक ह्या फेस्टिवलाची गरज ना. सनबर्नाक दक्षीण गोंयांतल्यान विरोध जातलो हें निश्चीत. बऱ्या कामां खातीर लोक जाती- धर्म सोडून एकठांय येतात हें फाटले लोकसभा वेंचणुकेंत दिसून आयलां. तेच प्रमाण सनबर्न फेस्टिवल दक्षीण गोंयांतल्यान भायर काडपा खातीर थळाव्या लोकांचो एकवट आसतलो. राज्य सरकारान सनबर्नाचे आयोजन करून लोकांक रस्त्यार देंवपाक लावचें न्हय, अशी मागणी ॲड. राधाराव ग्रासियस हांणी केल्या.
सनबर्न फेस्टिवलाक लागून ड्रग्सा कडेन संबंदीत वेवसाय वाडटा आनी ताचो परिणाम तरणाट्यांचेर जातना दिसता. ताका लागून सनबर्न फेस्टिवलाक दक्षीण गोंयांतूच न्हय जाल्यार गोंयांत करपाकूय विरोध आसतलो. गोंय सरकारान सनबर्ना बदला गोंयची संस्कृती मुखार हाडची. गोंयांतूय बके बँण्ड आसात. गोंयांतल्या कलाकारांक माची निर्माण करून दिवची. दक्षीण गोंयांतलो एकूय आमदार सनबर्न आयोजीत करपाक तेंको दिवचो ना, अशें बाणावलीचे आमदार व्हेन्झी व्हिएगश हांणी म्हणलां.
वेळ्ळीचे आमदार क्रूझ सिल्वा हांणी सनबर्ना विशीं उलयतना सांगलें, वेर्णा, सांकवाळच्या पठाराचेर वा बेतूलचे मेकळे सुवातेंत सनबर्न जावपाक शकता. ते विशीची निश्चीत म्हायती मेळूंक ना.
उत्तर गोंयांतल्या लोकांनी सनबर्न महोत्सवाक विरोध केला. थंय ड्रग्साच्या सुमारा भायल्या वापराक लागून जावपी लोकांनी परिस्थिती पळयल्या. हे खातीर तशी स्थिती दक्षीण गोंयांत जावपाक दिवचे नात. दक्षीण गोंयांत सनबर्न महोत्सवाक सदांच विरोध आसतलो, अशें क्रूझ हांणी म्हणलां.
दक्षीण गोंयांत सनबर्न महोत्सव आयोजीत करपाक विरोधी पक्ष काँग्रेसीन आदींच खर हरकत घेतल्या. ड्रग्स संस्कृतीक उर्बा दिवपी हो महोत्सव दक्षीम गोंयांत आयोजीत करपाक आमी खर विरोध करतले, अशें विरोधी पक्ष फुडारी युरी आलेमांव हांणी शुक्राराच पत्रकारां कडेन उलयतना सांगिल्लें.
लोकांक जाय तोच निर्णय सरकार घेतलें: सुभाष फळदेसाय
गोंयांतल्या पर्यटनाक चालना दिवपाचे नदरेन गोंय सरकार ते संबंदांत साबार निर्णय घेता. दक्षीण गोंयांतल्या लोकांक सनबर्न नाका जाल्यार, ताचेर गोंय सरकार ते विशीं निश्चीत योग्य निर्णय घेतलें. आतां मेरेन सरकारान लोकांक जाय तेंच निर्णय घेतल्यात, अशें मंत्री सुभाष फळदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
