भांगरभूंय | प्रतिनिधी
शेतांचें व्हड प्रमाणांत लुकसाण; लुकसाण भरपाय मेळपा खातीर यत्न: राजेश डिकॉस्टा
मडगांव: दक्षीण गोंयच्या खूबश्या वाठारांनी आडवेळ्या पावसाचो फटको बसलो. ताका लागून शेतकारांचें तांच्या उब्या आनी कापिल्ल्या भात शेतांचें व्हड प्रमाणांत लुकसाण जालें. लुकसाणेची पळोवणी सद्या सुरू आसा. कृशी कार्ड आशिल्ल्यां सयत आनी नाशिल्ल्याय शेतकारांच्या लुकसाणेची म्हायती सरकारा कडेन धाडून दितात आनी तांकां सगल्यांक भरपाय मेळची हे खातीर शेतकी विभाग यत्न करीत आसा अशें विभागीय शेतकी अधिकारी राजेश डिकॉस्टा हांणी सांगलें.
मडगांव शेतकी विभागीय कचेरे कडल्यान आडवेळ्या पावसाक लागून जाल्ल्या लुकसाणेची पळोवणी करतात. शेतकी विभागाच्या अधिकाऱ्यांनी लुकसाणीचें मुल्यांकन करपा खातीर आनी भरपाय दाव्यांचेर प्रक्रिया करपा खातीर तपासणी मोहीम गतीन केल्या.
विभागीय शेतकी अधिकारी राजेश डिकॉस्टा हांच्या मतान विभागान कुडटरे तपासणी पुराय केल्या आनी आतां वेळ्ळी मतदारसंघांतल्या गांवांनी पळोवणी करतात.
शेतकारांनी पिकांच्या लुकसाणीचे दावे सादर करचे अशे आवाहन तांणी केलें. खूबश्या वाठारांनी उदक सांचून उरपाची पातळी आनी मातयेची स्थिती प्रमाण पिकांचें लुकसाण जालां. उब्या पिकांच्या लुकसाणी बराबर, खूबश्या शेतकारांक हेर कामां करूंक मेळूंक नाशिल्ल्यान लेगीत लुकसाण सोंसचें पडलां. खूबश्या शेतकारांनी पयलींच भाताची कापणी केल्ली. पूण सेगीत पडिल्ल्या पावसाक लागून तांकां धान्य वेळार सुकोवंक आयलें ना. हाचो परिणाम, कापणी केल्ल्या भाताचेंय लुकसाण जालें अशें तांणी म्हणलें.
खूबसो काळ ओल्या हवामानाक लागून कापपाचीं यंत्रां शेतांत वचप लागीं लागीं कठीण जाल्लें. अजूनय कांय वाठारांत भाताची कापणी करपाची उरल्या. शेतांनी चड उदक आशिल्ल्यान सद्या यंत्राच्या आदारान भात कापणी करप शक्य ना. शेतकी विभागान सगल्या बादीत शेतकारांक तांच्या लुकसाणीचे दावे रोखडेच सादर करचें अशें आवाहन डिकॉस्टा हांणी करून लुकसाण भरपायेचो प्रस्ताव कळाव करिनासता सरकारा कडेन धाडून दिवंक मेळटलो. शेतकी संचालनालया खातीर एकठांय अहवाल तयार करचे पयलीं अधिकारी लुकसाणेची पडटाळणी करपा खातीर क्षेत्रीय मुल्यांकन सुरू दवरतात अशेंय डिकॉस्टा हांणी स्पश्ट केलें.
मजगतीं, वेळ्ळी, कुडटरी, लोटली, फातोड्डें आनी हेर वाठारांतल्या खूबश्या शेतकारांनी तांच्या पिकांच्या इबाडिल्ले स्थिती खातीर हुस्को उक्तायला. हवामान रोखडेंच सुदारले ना जाल्यार पीक आनीक पेड्डेर जातलें. सरकारान ह्या अनपेक्षीत लुकसाणींतल्यान थाकाय मेळपा खातीर अर्थीक मजत आनी सुकोवण्यांच्या सुविधां सयत मजत उपाय येवजण गतीन करपाचें आवाहन केलें.
फाटल्या दोत सप्तकांतल्या आडवेळ्या पावसाक लागून साश्टीच्या हेर वाठारांत कापणीचें काम विस्कळीत जालां. जाका लागून डझनभर शेतकार प्रभावीत जाल्यात. शेतकी अधिकाऱ्यांनी आस्वासन दिलां की खरे दावे पडटाळून पळयतले आनी पात्र शेतकारांक वेळेर भरपाय मेळटली हाची खाती करपा खातीर गरजेचीं सगलीं पावलां उबारतले. कृशी आधार येवजणेचो लाव हीं कृशी कार्डां आशिल्ल्या शेतकारांक दितात. पूण हाचे आदींय कृशी कार्ड नाशिल्ल्या शेतकारांक लुकसाण भरपाय दिल्या. ताका लागून लुकसाण जाल्ल्या शेतकारांची म्हायती वरिश्ठ कचेरे कडेन धाडून दितले आनी तांकां भरपाय दितले अशें राजेश डिकॉस्टा हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
