भांगरभूंय | प्रतिनिधी
मडगांव : दक्षीण गोंय जिल्ह्यांत दुचाकी चोरपाच्यो घडणुको वाडत आसात. फाटल्या दोन वर्सांत 45 दुचाकी चोरी प्रकरणां आशिल्लीं, अंदूं आतां मेरेन स म्हयन्यांत 30 दुचाकी चोरयेक गेल्ल्याची नोंद पुलिशेंत जाल्या.
दक्षीण गोंयांत फाटल्या तीन म्हयन्यांत मडगांव, फातोड्डें, वेर्णें, कोलवा, केपें, मायणा कुडटरी, फोंडें आनी वास्को ह्या वाठारांतल्यान 20 परस अदीक दुचाकी चोरयेक गेल्ल्याची नोंद जाल्या. ह्याच सप्तकांत नुवेंच्या जुझे रॉड्रिग्स हांच्या घरांतल्यान स्कुटर जाल्यार रायच्या रुझारियो डिसोझा हांचे गॅरेजींतल्यान मोटरसायकल चोरयेक गेल्ल्याची कागाळ मायणा कुडटरी पुलिशेंत नोंद जाल्या.
दक्षीण गोंयांत 2022 त 60 दुचाकी आनी मोटार चोरयेच्यो घडणुको घडिल्ल्यो जाल्यार 30 गाडयो जप्त केल्ल्यो. 2023 त 43 चोरयेच्यो घडणुको लेगीत नोंद जाल्ल्यो. तातूंत 28 गाडयो जप्त केल्ल्यो. 2024 त वट्ट 43 गाडयो चोरयेक गेल्ल्यो. तातूंतल्यो 23 गाडयो जप्त केल्ल्यो. चोरयेच्यो घडणुको चालूच आशिल्ल्यान पुलिसांनी लोकांक सादूर रावपाचे आनी सुरक्षीत, चड उडवाड आशिल्ले सुवातेंत गाडयो पार्क करपाचें तशेंच कुलूप आनी सुरक्षा उपाय येवजण्यांची खात्री करची, असो उलो पुलिसांनी मारला.
चोरयेच्या घडणुकांनी वाड ही पार्किंगच्या उणाव आशिल्ल्या मुळाव्या सुविधां कडेन संबंदीत आसा. मडगांव सारक्या शारांत लेगीत दुचाकी मेकळे सुवातेर पार्क करतात. लोक पुलीस स्टेशनार वतात, पूण चवकशी चालू आशिल्ल्याचें वा कर्मचारी उणे आशिल्ल्यान तपासांत कळाव जाता, अशीं कारणां दितात, अश्यो कागाळी लोक करतात.
गाडयांचे स्पॅरपार्ट विकपाचे प्रकार
पुरावे नश्ट करचे खातीर खूबश्यो गाडयो मोडटात आनी ताचे स्पॅरपार्ट वेगवेगळ्या वाठारांनी विकतात. कांय खेपे गाडयेची वळख पटची न्हय हे खातीर नंबरप्लेट बदलतात वा गाडयो परतून रंगयतात. पुलिसांनी लेगीत खूब खेपे तपासा वेळार खूबश्यो मोडिल्ल्यो स्कुटरी आनी मोटारसायकली जप्त केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
