भांगरभूंय | प्रतिनिधी
पुलीस अधिक्षक टिकमसिंग वर्मा हांणी दिली म्हायती
मडगांव: दक्षीण गोंयांतल्या सगल्या पुलीस स्टेशन वाठारांनी सांजवेळा स ते रातच्या 10 वरां मेरेन आनी रातचीं 12 ते फांतोडेर पांच वरां मेरेन विवीध सुवातांनी वाहन तपासणी मोहीम राबयतात. हातूंतल्यान गुन्यांवांचेर आळो घालपा खातीर यत्न जायत आसात अशी म्हायती दक्षीण गोंय जिल्हो पुलीस अधिक्षक टिकमसिंग वर्मा हांणी दिली.
तांणी मुखार उलयतना म्हणलें, दक्षीण गोंयांतल्या गुन्यांवांचेर आळो हाडपाचें काम पुलीस करतात. फाटल्या कांय दिसांनी ई सिगार आनी ड्रग्ज बाळगुप्यांचेर धाडी घालून तांचेर कारवाय केल्या. दोन दिसां पयलीं नेसाय हांगा ऑनलायन जुगार अड्ड्याचेर धाड घालून 20 जाणांक अटक केल्ली. तशेंच 4.40 लाख रुपया रोख, टॅब आनी हेर साहित्य जप्त केल्लें. पुलिसांक म्हायती मेळ्ळे उपरांत कारवाय करतात.
नावेली एके जाण्टे बायलेच्या गळ्यांतली भांगराची सरपळी चोरयेक गेल्या ते विशीं गुन्यांव नोंद करून तपास करतात. तशेंच दक्षीण गोंयांतल्या विवीध पुलीस स्टेशन वाठारांत विवीध सुवातांनी नाकाबंदी करतात. सांजवेळा स वरां सावन फांतोडेर पांच वरां मेरेन पुलीस वाहनांची तपासणी करतले. शेनवारा राबयिल्ले मोहिमेंत 1419 जाणांची तपासणी करून 980 वाहनां तपासलीं. 12 जाणांक प्रतिबंधात्मक अटक, कोटपा कायद्या प्रमाण 86 जाणांचेर जाल्यार धुम्रपान आनी थुकप अशा गुन्यांवांत 56 जाणांचेर कारवाय केल्या. नेमांचें उल्लंघन करप्यांचेर कारवाय करतात अशें अधिक्षक वर्मा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
