दक्षीण गोंयांत आपत्कालीन परिस्थितीचेर तालीम
भांगरभूंय | प्रतिनिधी
जिल्लोधिकारी एग्ना क्लिटस हांचे सयत हेर अधिकार्यांनी घेतलो नियाळ
मडगांव : दक्षीण गोंय जिल्ह्यांत शुक्रारा सकाळीं चक्रीवादळाचे स्थितींत लोकांची सुटका आनी परिस्थितीचेर नियंत्रण हाडपा खातीर तालीम दिली. संवाद यंत्रणेंतली आडखळ, जीएसआय यंत्रणेचो वापर कशे तरेन जावपाक शकता हाचीय पळोवणी केली. दक्षीण गोंय जिल्लोधिकार्यांनी कार्यालयांतल्यान सगले परिस्थितीचो नियाळ घेतलो.
दक्षीण गोंयांत शुक्रारा सकाळ सावन आपत्कालीन स्थितींत खंयचें खातें कशें काम करता, त्या वेळार येवपी आडखळींक कशें तोंड दिता आनी प्रशासनान केल्ले तयारेंतले उणाव कसले आसात, हाची चाचणी करपाक तालीम घेतली. मुरगांव पोर्ट ऑथोरिटी, गोवा शिपयार्ड, आयओसीएल टर्मिनल, बायना दर्यादेग वाठार, चौगुले शिपयार्ड फोंडें, मुर्डीबाग खांडेपार फोंडें आनी नाकेरी बेतूल पंचायतींतलें तलाठी कार्यालय हांगा ही तालीम घेतली. चक्री वादळ आयले उपरांत ते सुवातेर लोकांची सुरक्षितपणान सुटका करप, तांकां शेल्टरांत धाडून तांकां सुविधायो दिवप, तांकां उपचारा खातीर दाखल करप आनी परिस्थितीचेर नियंत्रण मेळोवप ह्या गजालींचेर भर दिली.
ह्या आपत्कालीन यंत्रणेचे तालिमेंत हॉस्पिटलांतल्या म्हत्वाच्या सुवातांचेर म्हायती घेतली. चक्रीवादळ शेल्टर, हॉस्पिटलांच्यो सुविधायो, उपचारा खातीर व्हरपाच्यो लागपी सुविधा हांची म्हायती घेतली. तशेंच संवादाची साधनां बंद पडल्यार खंयचीं साधनां वापरतले, हाचो अदमास घेतलो. हे तालिमेंत जीएसआय सुविधेचो वापरूय करून घेतिल्लो. आपत्कालीन स्थिती आयल्यार कसलेच तरेचो उणाव जावचो न्हय हो उद्देश आशिल्लो. हे तालिमेंत नेव्ही आनी आर्मी, कोस्टगार्डच्या कर्मचार्यां सयत समाजांतल्यो स्वयंसेवी संस्था, पालिका, पंचायत हांचोय आसपाव करून घेतलो. व्हड चक्रीवादळाचें संकट आयल्यार कसले उपाय केल्यात, हाची म्हायती हे तालिमेंतल्यान घेतली. दरेका म्हालांतल्या कमांडर अधिकार्यांनी परिस्थितीची म्हायती जिल्लो पांवड्यार दिली. जाल्यार जिल्लो पांवड्यार कक्ष तयार केल्लो. थंयसर सगल्या सुवातांच्या परिस्थितीचो आढावो जिल्लोधिकारी क्लिटस हांणी घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
